រដ្ឋមន្ត្រីក្រសួងការបរទេស និងសហប្រតិបត្តិការកម្ពុជាលោក ហោ ណាំហុង បានផ្ញើលិខិតមួយច្បាប់អបអរលោកស្រី អ៊ុងសាន ស៊ូជី ក្នុងឱកាសដែលលោកស្រីត្រូវបានតែងតាំងជារដ្ឋមន្ត្រីការបរទេសនៃសាធារណរដ្ឋសហភាពមីយ៉ានម៉ា ហើយលោកសង្ឃឹមថា ចំណងមិត្តភាពរវាងប្រទេសទាំងពីរនឹងបន្តរីកចម្រើនតទៅមុខទៀត។
ក្នុងលិខិតមួយច្បាប់ជូនទៅកាន់លោក ស្រី អ៊ុងសាន ស៊ូជី ចុះថ្ងៃទី៣០ ខែមីនា លោក ហោ ណាំហុង លោកមានក្ដីសោមនស្សរីករាយជាខ្លាំង ដែលលោកស្រី ស៊ូជី ត្រូវបានសាធារណរដ្ឋសហភាពមីយ៉ានម៉ា បានតែងតាំងជារដ្ឋមន្ត្រីការបរទេសនៃប្រទេសនេះ។
លោក ហោ ណាំហុង បន្តថា៖ “ខ្ញុំមានជំនឿយ៉ាងមុតមាំថា ចំណងមិត្តភាពដ៏ជិតស្និទ្ធជាប្រពៃណី និងកិច្ចសហប្រត្តិបត្តិការរវាប្រទេសទាំងពីរនឹងបន្តរីកចម្រើននៅឆ្នាំទៅមុខទៀត ដើម្បីជាផលប្រយោជន៍ទៅវិញទៅមកនៃប្រជាជាតិ និងប្រជាជនយើងទាំងពីរ ក៏ដូចជា ការកសាងសហគមន៍អាស៊ានដ៏រឹងមាំ និងសមស្រប”។
គួរបញ្ជាក់ថា កាលពីម្សិលមិញ លោកស្រី អ៊ុងសាន ស៊ូជី ត្រូវបានតែងតាំងជារដ្ឋមន្ត្រីការបរទេស និងត្រូវដឹកនាំក្រសួងផ្សេងទៀតដូចជាក្រសួងអប់រំ ក្រសួងថាមពល និងអគ្គិសនី និងខុទ្ទកាល័យប្រធានាធិបតី។ លោកស្រីត្រូវបានរារាំងឲ្យក្លាយជាប្រធានាធិបតី ព្រោះរដ្ឋធម្មនុញដែលរៀបចំឡើងដោយក្រុមយោធាបានកំណត់ថា អ្នកដែលមានប្តី ឬកូនជាជនបរទេសមិនអាចក្លាយជាប្រធានាធិបតីបានទេ ខណៈលោកស្រីមានប្តីជាជនជាតិអង់គ្លេស និងមានកូនប្រុសពីរនាក់ផង៕
