ស្ត្រីសកម្មជនការពារសិទ្ធិមនុស្សជនជាតិចិនបានថ្លែងថា គាត់ត្រូវបានរដ្ឋាភិបាលរារាំងមិនឲ្យចាកចេញពីប្រទេស ខណៈរូបគាត់មានគម្រោងធ្វើដំណើរទៅសហរដ្ឋអាមេរិកនៅដើមសប្តាហ៍នេះដើម្បីទទួលពានរង្វាន់។
សកម្មជនការពារសិទ្ធិមនុស្សលោកស្រី Ni Yulan មានគម្រោងទៅសហរដ្ឋអាមេរិកដើម្បីទទួលពានរង្វាន់ស្ត្រីក្លាហានអន្តរជាតិ។ ប៉ុន្តែអាជ្ញាធរបានបដិសេធមិនឲ្យធ្វើដំណើរទៅដោយចោទលោកស្រីនិងស្វាមីរបស់គាត់ថា ជាប់ពាក់ព័ន្ធនិងរឿងរ៉ាវផ្សេងៗ។ នេះបើតាមសារព័ត៌មាន BBC។
លោកស្រី Ni Yulan ជាសកម្មជនការពារសិទ្ធិមនុស្សនិងមេធាវីផងនោះថ្លែងថាការធ្វើដំណើរជាសិទ្ធិរបស់ប្រជាពលរដ្ឋ។ លោកស្រីមានគម្រោងទៅទទួលពានរង្វាន់កាលពីថ្ងៃអង្គារនៅវ៉ាស៊ីនតោន ហើយគាត់បានដាក់ពាក្យស្នើសុំលិខិតឆ្លងដែនថ្មីកាលពីខែមុនតែអាជ្ញាធរមិនឲ្យ។
លោកស្រីថ្លែងថាពេលដែលគាត់ទៅទទួលលិខិតឆ្លងដែនត្រូវគេប្រាប់ថាគាត់ត្រូវហាមឃាត់មិនឲ្យធ្វើដំណើរទៅក្រៅប្រទេសទេ។ សមត្ថកិច្ចចោទលោកស្រី Ni Yulan ថាជាប់ពាក់ព័ន្ធបទឧក្រិដ្ឋដោយសារលោកស្រីសរសេរលិខិតគាំជនជាប់ចោទមួយរូប។
រដ្ឋាភិបាលអាមេរិកបានទទួលស្គាល់ស្ត្រី១៤នាក់មកពីទូទាំងពិភពលោកថាជាស្ត្រីមានសមត្ថភាពក្នុងការការពារយុត្តិធម៌ សិទ្ធិមនុស្ស លទ្ធិប្រជាធិបតេយ្យ សមភាពខាងយេនឌ័រ និងការផ្តល់អំណាចដល់ក្រុមស្ត្រី។ ក្នុងចំណោមស្ត្រីទាំង១៤នោះក៏មានលោកស្រី Ni Yulan ផងដែរ៕
