យ៉ាងហោចណាស់មនុស្ស២២នាក់ ត្រូវបានរាយការណ៍ថា ស្លាប់ដោយសារការបាក់ស្ពានអាកាសមួយនៅក្នុង ប្រទេសឥណ្ឌា ខណៈស្ពាននោះកំពុងដំណើរការសាងសង់ ហើយ មនុស្សរាប់សិបនាក់ផ្សេងទៀត កំពុងជាប់ក្នុងបំណែកបែកបាក់នោះ។
ស្ពានអាកាសមួយនៅក្នុងទីក្រុងកុលកាតា ទើបសាងសង់បាន១០០ម៉ែត្រ បានបាក់ រលំកាលពីល្ងាចថ្ងៃព្រហស្បតិ៍ម្សិលមិញ នៅចំពេលដែលមនុស្សធ្វើដំណើរ ច្រើនលើដងផ្លូវ។ របាយការណ៍បឋមបង្ហាញថា មនុស្ស២២នាក់បានស្លាប់ ជិត១០០នាក់រងរបួស និងរាប់សិប នាក់ផ្សេងទៀត កំពុងជាប់ក្នុងបំណែកបែងបាក់។នេះ បើតាមសារព័ត៌មានChannel News Asia។
អ្នកនាំពាក្យអាជ្ញាធរជាតិគ្រប់គ្រងគ្រោះមហន្តរាយលោក Anil Shekhawat ថ្លែងថា មនុស្សចំនួន៩២នាក់ ដែលរងរបួស ដោយសារការបាក់ស្ពាននេះ កំពុងសង្គ្រោះនៅមន្ទីរពេទ្យ។ លោកថ្លែងថា ចំពោះចំនួនអ្នកស្លាប់អាចនឹង មានការកើន ឡើងលើស២២នាក់ទៀត ព្រោះ មនុស្សរាប់សិបនាក់ទៀតកប់នៅក្នុងគំនរកំទិចបែងបាក់នេះ ហើយក្រុមជួយ សង្គ្រោះ កំពុង បន្តស្វែងរក។