មហាអំណាចចិន និងអាមេរិក ព្រមព្រៀងសហការធ្វើការងាររួមគ្នា ដើម្បីបង្ការកុំឲ្យប្រទេសកូរ៉េខាងជើង បាញ់សាកល្បងអាវុធនុយក្លេងអ៊ែជាថ្មីទៀត ខណៈរដ្ឋឯកោកូរ៉េខាងជើងនេះត្រៀមសាកល្បងអាវុធរបស់ខ្លួនជាថ្មីទៀត។
នៅប៉ុន្មានសប្តាហ៍នេះ កូរ៉េខាងជើងបានរៀបចំសាកល្បងគ្រាប់បែកអ៊ីដ្រូសែន និង កាំជ្រូចមីស៊ីលជាថ្មីទៀត ខណៈប្រទេសនេះកំពុងគំរាមកំហែងសហរដ្ឋអាមេរិក និង កូរ៉េខាងត្បូង។
នៅក្នុងជំនួបក្រៅកិច្ចប្រជុំកំពូលពីបញ្ហានុយក្លេអ៊ែ នៅទីក្រុងវ៉ាស៊ីនតោន កាលពីថ្ងៃ ព្រហស្បតិ៍ម្សិលមិញលោក អូប៉ាម៉ា និង លោកស៊ីជីនពីង បានព្រមព្រៀងគ្នា ក្នុងការក្សា កុំឲ្យមានការសាកល្បងអាវុធនុយក្លេអ៊ែនៅក្នុងឧបទ្វីបកូរ៉េ។
លោកអូ ប៉ាម៉ា ថ្លែងថា លោកនិង លោក ស៊ី បានព្រមព្រាងគ្នាបំពេញកាតព្វកិច្ច អន្តរជាតិ ក្នុងការធ្វើយ៉ាងម៉េចក្នុងការទប់ស្កាត់កុំឲ្យមានការសាកល្បងអាវុធនុយក្លេអ៊ែដែលបង្កភាពតានតឹង និង ហិង្សាកើតឡើង។
ចំណែកលោកស៊ី ត្រូវបានសារព័ត៌មានរដ្ឋចិន ស៊ីនហូរដកស្រង់សម្តីចុះផ្សាយថា វាគឺជាការសំខាន់ណាស់ ដែលគ្រប់ភាគីទាំងអស់អនុវត្តន៍ការដាក់ទណ្ឌកម្មឲ្យបានតឹងរឹង និង ពេញលេញ លើការសម្រេចរបស់អង្គការសហប្រជាជាតិលើកូរ៉េខាងជើង។ ទោះយ៉ាងណា ចិនគឺជាប្រទេសស្និទ្ធស្នាល និងជាដៃគូពាណិជ្ជកម្មធំបំផុតជាមួយកូរ៉េខាងជើង។
កូរ៉េខាងជើងបានបាញ់សាកល្បងអាវុធនុយក្លេអ៊ែលើកទី៤របស់ខ្លួនកាលពីថ្ងៃទី៦ខែមករា និង បាញ់កាំជ្រូចឆ្លងទ្វីបកាលពីថ្ងៃទី៧ខែកុម្ភៈ នាំឲ្យអង្គការសហប្រជាជាតិប្រកាសដាក់ទណ្ឌកម្មបន្ថែមទៀត៕
