​អាដហុក​ច្រាន​ចោល​ការលើកឡើង​ថា​មេធាវី​ការពារ​ក្ដី​កញ្ញា​ស្រីមុំ​ដកខ្លួន​ចេញ​

កញ្ញា ខុម ចាន់ដារ៉ាទី ហៅស្រីមុំ ដែលត្រូវបានគេទម្លាយខ្សែអាត់ថា​ជាសំឡេង​របស់នាងសន្ទនា​ស្នេហាជាមួយលោក កឹម សុខា​(រូបថតដោយ ហ៊ុយ ឧស្សាហ៍)

សមាគមអាដហុក បានច្រានចោលចំពោះការលើកឡើងថា មេធាវីការពារក្ដីឲ្យកញ្ញា ខុម ចាន់តារ៉ាទី ហៅស្រី មុំ ដកខ្លួនចេញ ខណៈតុលាការចេញដីកាកោះ ហៅកូនក្តីឲ្យចូលបំភ្លឺដោយសង្គមស៊ីវិលថា ករណីកោះហៅនេះជារឿងថ្មី ហើយសាមីុជនក៏ត្រូវដាក់ពាក្យជាថ្មីសុំមេធាវីការពារ។

ការច្រានចោលរបស់សមាគមអាដហុក នោះបន្ទាប់ពីមានគេហទំព័រក្នុងស្រុកខ្លះ បានចុះផ្សាយថា មេធាវីការពារក្តី «ស្រីមុំ» ដកខ្លួនចេញ ខណៈស្រីមុំ ត្រូវកោះហៅឱ្យចូលបំភ្លឺ នៅមុខតុលាការ ថ្ងៃទី ៨ មេសាខាងមុខ។

កញ្ញាស្រី មុំ ត្រូវបានព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ ចេញដីកាកោះឲ្យចូលបំភ្លឺនៅថ្ងៃទី ៨ ខែ មេសា ម៉ោង៨ និង ៣០ នាទីព្រឹក ដែលព្រះរាជអាជ្ញាថា ដើម្បីសាកសួរពីដំណើររឿង របាយការណ៍របស់សមត្ថកិច្ចនៃនាយកដ្ឋានប្រឆាំងភេវកម្ម និង ឧក្រិដ្ឋកម្មឆ្លងដែនបង្ហាញថា មានករណីផ្ដល់សក្ខីកម្មក្លែង និង មានអំពើពេស្យាចារ។

ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី សុខា មានប្រសាសន៍ប្រាប់វីអូឌី(VOD)នៅថ្ងៃទី៣ មេសានេះថា ដីកាកោះហៅនោះ ជាករណីពីរថ្មីទៀត ដែលតម្រូវឲ្យកញ្ញា ស្រី មុំ ស្នើរសុំឲ្យមានការរៀបចំមេធាវីថ្មីដើម្បីការពារលើសំណុំរឿងនេះ។ លោកថា មិនមែនមានន័យថា មេធាវីបានដកខ្លួនចេញឈប់ការពារកូនក្តីនោះទេ។

លោកបន្ថែមថា៖ “ជាធម្មតាមេធាវីគេដាក់ការពារលើករណីមុន ករណីមុនគេនៅតែការពារធម្មតា ចំណែកឯរឿងក្រោយ កាលណាមានរឿងថ្មី គេត្រូវតែសុំឡើងវិញថ្មីទៀត ព្រោះអីរឿងខុសគ្នា”។

លោកបន្ថែមថា មកដល់ពេលនេះសមាគមការពារសិទ្ធិមនុស្សអាដហុក មិនទាន់ចាត់មេធាវីណាមួយសម្រាប់កញ្ញាស្រី មុំ លើសំណុំរឿងនេះនៅឡើយទេ ព្រោះមិនទាន់មានការស្នើរពីសមីុជន។

គួរបញ្ជាក់ថា កាលពីដើមខែមីនា សមាគមការពារសិទ្ធិមនុស្សអាដហុក បានផ្ដល់មេធាវីការពារក្ដីឲ្យកញ្ញាស្រីមុំ ចំពោះការចូលបំភ្លឺទាក់ទងទៅនឹងបញ្ហាខ្សែអាត់សំឡេងសន្ទនាស្នេហាដែលគេសង្ស័យថា ជាប់ពាក់ពន្ធជាមួយនឹងប្រធានស្ដីទីគណបក្សប្រឆាំង លោក កឹម សុខា។

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered