រថភ្លើងមួយខ្សែបានរត់ធ្លាក់ផ្លូវនៅពេលដែលវាបានបុកសម្ភារសំណង់នៅតាមផ្លូវនៅជិតទីក្រុងហ្វីឡាដាហ្វៀ សហរដ្ឋអាមេរិកកាលពីថ្ងៃអាទិត្យដោយឧបទ្ទវហេតុនេះបានសម្លាប់មនុស្ស២នាក់និងរាប់សិបនាក់ទៀតបានរងរបួស។
សារព័ត៌មាន Channel News Asia បានរាយការណ៍ថារថភ្លើងរបស់ក្រុមហ៊ុន Amtrack នោះបានធ្វើដំណើរពីទីក្រុងញូយ៉កទៅកាន់ទីក្រុងសាវ៉ាន់ណា(Savannah)ក្នុងរដ្ឋចចចៀរ (Georgia) តាមរយៈខ្សែផ្លូវដ៏មមាញឹកមួយខ្សែនៅភាគឦសានដោយបានបុកត្រាក់ទ័រឈូសដីមួយ ហើយមនុស្សដែលបានស្លាប់ទាំង២នាក់នោះគឺជាកម្មករផ្លូវរថភ្លើង។
ឧបទ្ទវហេតុនេះបានកើតឡើងនៅក្នុងទីក្រុងឆេសស្ទ័រ (Chester) ក្នុងរដ្ឋប៉េនស៊ីលវ៉ានៀ (Pennsylvania) នៅមុនម៉ោង៨ព្រឹកបន្តិច ដោយបង្អួចខាងនៃរថភ្លើងដែលមានដឹកអ្នកដំណើរ និងនាវិកជិត៣៥០នាក់ បានប៉ះទង្គិចនៅក្នុងហេតុការណ៍នេះ។
ស្នងការអគ្គិភ័យនៅទីក្រុងឆេសស្ទ័រ លោក Travis Thomas បាននិយាយថា មនុស្ស៣៥នាក់បានទទួលការព្យាបាលនៅមន្ទីរពេទ្យសម្រាប់ការរងរបួស “ដែលគំរាមកំហែងដល់ជីវិត” ។ លោកបានបន្ថែមថាអ្នកដំណើរទាំងនោះត្រូវបានបញ្ជូនត្រឡប់ទៅទីក្រុងហ្វីឡាដាហ្វៀ (Philadelphia) វិញដើម្បីយកឥវ៉ាន់របស់ពួកគេវិញ។
ទោះយ៉ាងណាក្រុមហ៊ុន Amtrak មិនបានផ្តល់ព័ត៌មានលម្អិតពីអ្នកស្លាប់ទាំងពីរនាក់ភ្លាមៗនោះទេ៕