អតីតប្រធានាធិបតីមីយ៉ាន់ម៉ាលោក ថេន​ សេន​ សាងផ្នួស

អតីតប្រធានាធិបតីមីយ៉ាន់ម៉ាលោក ថេន សេន បានកោរសក់ ហើយប្រើវេលាខ្លះនៃការចូលនិវត្តន៍របស់លោក សាងផ្នួសជាព្រះសង្ឃក្នុងពុទ្ធសាសនាកាលពីថ្ងៃចន្ទម្សិលមិញ។​

មន្ត្រីរដ្ឋាភិបាលមីយ៉ាន់ម៉ាថ្លែងថាការចូលសាងផ្នូសរបស់លោក ថេន សេន នេះគឺធ្វើឡើងក្រោយ៤ថ្ងៃនៃការផ្ទេរអំណាចជាប្រវត្តិសាស្ត្រទៅឲ្យគណបក្សប្រឆាំងរបស់លោកស្រី អ៊ុង សានស៊ូជី។​ នេះបើតាមសារព័ត៌មាន Fox News។​​

រូបថតរបស់លោក ថេន សេន ក្នុងសភាពគ្រងស្បង់ចីពរនិងកោរសក់នៅជាមួយព្រះសង្ឃផ្សេងៗទៀតត្រូវបានបណ្តាញសង្គមចែករំលែកតគ្នា។​

ក្រសួងព័ត៌មានរបស់មីយ៉ាន់ម៉ាបានចេញសេចក្តីប្រកាសព័ត៌មានបញ្ជាក់ថាលោក ថេន សេន នឹងចំណាយពេលសម្រាប់ការសាងផ្នួសរយៈពេល៥ថ្ងៃ។​

លោក ថេន សេន បច្ចុប្បន្នមានអាយុ៧០ឆ្នាំ លោកជាប្រធានាធិបតីទី៨របស់មីយ៉ាន់ម៉ាដែលជ្រើសរើសដោយក្រុមយោធាចន្លោះថ្ងៃទី៣០ខែមីនាឆ្នាំ២០១១ដល់ថ្ងៃទី៣០ខែមីនា២០១៦៕