ក្រសួងប្រៃសណីយ៍ថាច្បាប់​ទូរគម​នាគមន៍មិន​ធ្វើឲ្យប៉ះពាល់​ដល់សិទ្ធិបញ្ចេញមតិទេ​

ក្រសួងប្រៃសណីយ៍អះអាងថា​ច្បាប់ស្តីពីទូរគម​នាគមន៍មិនបានធ្វើឲ្យប៉ះពាល់​ដល់សិទ្ធិនិង​សេរីភាពបញ្ចេញមតិ​របស់​បុគ្គល​​តាមប្រព័ន្ធបច្ចេកវិទ្យា​​នោះទេ។

នេះជាការឆ្លើយតបរបស់រដ្ឋាភិបាលទៅកាន់អង្គការ​លីកាដូដែលបានចេញរបាយការណ៍សង្ខេបមួយ​កាលពីចុងខែមីនាថា​ច្បាប់ស្តីពីទូរគមនាគមន៍មាន​មាត្រា​មួយចំនួនចែងមករំលោភលើច្បាប់​រដ្ឋធម្មនុញ្ញនិងច្បាប់អន្តរជាតិ។

ប៉ុន្តែក្រសួង​ប្រៃសណីយ៍និង​ទូរគមនាគមន៍កាលពីថ្ងៃទី៥ខែមេសាបាន​ចេញសេចក្តីបំភ្លឺជុំវិញការ​លើកឡើង​របស់អង្គការ​លីកាដូនេះ​ថា ច្បាប់នេះមានគោលបំណងដើម្បី​ផ្តល់សេវាទូរគមនាគមន៍និង​លើកទឹកចិត្តអ្នក​វិនិយោគលើវិស័យទូរគមនាគមន៍ រួមទំាងការពារប្រយោជន៍ស្រប​ច្បាប់របស់អ្នកប្រើប្រាស់ និង​ជួយរកចំណូលជូន​ជាតិ មិនដូច​ការ​លើកឡើង​របស់អង្គការ​លីកាដូដែលថាច្បាប់​នេះរិតត្បិតសេរីភាពរបស់បុគ្គលនោះទេ។ ក្រសួងបានបន្តថា៖ ប្រៃសណីយ៍និង​ទូរគមនាគមន៍មានការ​សោកស្តាយចំពោះការបកស្រាយផ្ទុយពីការពិតនូវ​អត្តន័យនៃច្បាប់ស្តីពីទូរគមនាគមន៍ដែលធ្វើឡើង​ដោយអង្គការមួយនោះគ្មានតម្លាភាព ដោយគ្មានបានពិភាក្សាស្វែងយល់ពីច្បាប់នេះ។ ក្រសួងច្រានចោល​ទំាងស្រុង​ចំពោះការលើកឡើង​ថា​ច្បាប់នេះ ធ្វើឲ្យ​ប៉ះពាល់យ៉ាងធ្ងន់ធ្ងរដល់សិទ្ធិសេរីភាពក្នុង​ការ​បញ្ចេញមតិនិង​ឯកជនភាពរបស់បុគ្គលគ្រប់រូប​នៅកម្ពុជា​”។

សេចក្តីបំភ្លឺដដែល​ឲ្យដឹង​ទៀត​ថាច្បាប់​ស្តីពីទូរគមនាគមន៍បង្កើតឡើង​ដោយ​មានភាគីចំរុះចូល​រួម​ដូចជា​វិស័យឯកជន តំណាង​ស្ថានទូតជប៉ុន អង្គការ​Jica សហភាពទូរគមនាគមន៍អន្តរជាតិ និង​អន្តរក្រសួងជាដើម។

អ្នកយកព័ត៌មានVODព្យាយាមសុំការ​បំភ្លឺបន្ថែមពីអ្នកនាំពាក្យ​ក្រសួង​ប្រៃសណីយ៍និង​ទូរគមនាគមន៍លោក មាស ប៉ូ នៅថ្ងៃពុធនេះដែរ ប៉ុន្តែលោកថាជាប់រវល់ប្រជុំ។

អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សអង្គការលីកាដូ លោក អំ សំអាត យល់ថាក្រសួង​គួរតែទទួលយកនូ​វ​ការ​រិះគន់​នៅចំណុច​ខ្វះខាតដោយថាបើ​មិនមានការ​កែមាត្រា​មួយចំនួន​ក្នុង​ច្បាប់​នោះទេ លោកព្រួយបារម្ភថា​នៅថ្ងៃក្រោយអ្នកនយោបាយ​យកច្បាប់នេះធ្វើជាឧបករណ៍ដើម្បីគាប​សង្កត់​ប្រជាពលរដ្ឋ។ លោកបន្តថា​៖ អ្វីដែលគួរឲ្យព្រួយបារម្ភនៅក្នុងច្បាប់នេះគឺមានការ​ដាក់ទោសទណ្ឌផ្នែកព្រហ្មទណ្ឌ​យ៉ាងធ្ងន់ធ្ងរចំពោះអ្នកគ្រប់គ្រង​ អ្នកប្រើប្រាស់​ អ្នកចែកចាយ​នូវ​ប្រព័ន្ធទូរគមនាគមន៍នេះ​ នេះហើយ​ដែលយើងមានការ​ព្រួយបារម្ភ ព្រោះយើង​ខ្លាច​ច្បាប់នេះ​វាក្លាយ​ទៅជាឧបករណ៍សម្រាប់​អ្នក​នយោបាយ​ក្នុង​ការ​ប្រើប្រាស់វិធី​ទំាងអស់នេះ ដើម្បី​ជា​ការ​គាបសង្កត់​និង​បិទសិទ្ធិសេរីភាពរបស់ប្រជាពលរដ្ឋ​នោះ​​​”។

ក្នុង​របាយការណ៍សង្ខេបរបស់អង្គការលីកាដូបានកត់សំគាល់ថាច្បាប់​ស្តីពី​ទូរគមនាគមន៍បាន​ផ្តល់​សិទិ្ធ​​អំណាច​ដល់​អាជ្ញាធរ​រដ្ឋ​ដោយ​សម្ងាត់​ក្នុងការ​ចូលស្តាប់​គ្រប់​ប្រព័ន្ធ​ទូរគមនាគមន៍និង​ដាក់​ទណ្ឌកម្ម​ចំពោះ​ការ​ប្រើប្រាស់​ប្រព័ន្ធ​ទូរគមនាគមន៍​អេឡិច​ត្រូ​និច​រវាង​បុគ្គល​និង​បុគ្គលដែល​ផ្តល់​ផល​អវិជ្ជមាន​យ៉ាងខ្លាំង​ដល់​សេរីភាព​នៃការ​បញ្ចេញមតិ។ រាល់​ការ​សន្ទនា​តាមរយៈ​ទូរស័ព្ទ ការផ្ញើសារ​ជាអក្សរ អ៊ីមែល ឬ​សកម្មភាព​របស់​ប្រព័ន្ធ​ផ្សព្វផ្សាយ​ព័ត៌មាន​សង្គមនឹង​ត្រូវស្ថិត​ក្រោមការ​ត្រួតពិនិត្យ (និងជា​កម្មវត្ថុ​នៃការ​ដាក់​ទណ្ឌកម្ម) គ្រប់​ពេល​វេលា ហើយ​បុគ្គល​ដែល​ពាក់ព័ន្ធ​នឹង​រឿងនោះ​មិនបាន​ដឹងខ្លួន​ទាល់តែ​សោះ។

របាយការណ៍ដដែល​ប​ញ្ជាក់ថាបុគ្គលនានាអាចនឹង​ប្រឈម​មុខ​នឹង​ទោស​ពន្ធនាគារ​រហូត​ដល់១៥ឆ្នាំដោយ​គ្រាន់តែ​បញ្ចេញ​មតិ​តាមប្រព័ន្ធ ហ្វេសប៊ុក ប្រសិន​បើគេ​ចាត់​ទុកថា​បុគ្គល​នោះ​ប៉ះពាល់​ដល់ “សន្តិសុខ​ជាតិ” ដែល​ត្រូវ​បាន​ចែង​មិន​ច្បាស់លាស់​នៅក្នុង​ច្បាប់​នេះ។

ក្នុងមាត្រា៩៧ នៃច្បាប់ស្តីពីទូរគមនាគមន៍មានខ្លឹមសារថា ការលបស្តាប់ឬការលបថតការសន្ទនាដោយប្រើប្រាស់ប្រព័ន្ធទូរគមនាគមន៍ដោយបុគ្គលដែលពុំមែនជាភាគីនៃការសន្ទនាត្រូវផ្តន្ទាទោសពី១ខែទៅ១ឆ្នាំនិងពិ​ន័យជាប្រាក់ពី១សែនរៀលទៅ២លានរៀល៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered