នៅអ៊ីស្លង់កំពុងជ្រើសរើសនាយករដ្ឋមន្ត្រីថ្មីបន្ទាប់ពីអ្នកចាស់លាលែងពីតំណែង​

គណបក្សនយោបាយនៅក្នុងប្រទេសអ៊ីស្លង់បានព្រមព្រៀងគ្នាក្នុងការបោះឆ្នោតជ្រើសរើសនាយករដ្ឋមន្ត្រីថ្មីនៅ​ពេលខាងមុខ ប៉ុន្តែពេលនេះ​ពួកគេបានជ្រើសរើសរដ្ឋមន្ត្រីមួយរូបឲ្យកាន់តំណែងនេះបណ្តោះអាសន្ន។​

កាលពីថ្ងៃអង្គារនាយករដ្ឋមន្ត្រីអ៊ីស្លង់​លោក​ Sigmundur David Gunnlaugsson បានប្រកាសលាលែងចេញពីតំណែងបន្ទាប់ពីមានការចោទថាលោក​បានលាក់លុយនៅក្រៅប្រទេសតាមការបែកធ្លាយឯកសាររបស់ក្រុមអ្នកច្បាប់នៅប៉ាណាម៉ា។​ ទោះយ៉ាងណានាយករដ្ឋមន្ត្រីរូបនេះបដិសេធថាលោកមិនបានលាក់លុយដូចការចោទប្រកាន់ទេតែលោកលាលែងដើម្បីឲ្យមានការស៊ើបអង្កេតលើករណីនេះតាមការទាមទាររបស់ប្រជាពលរដ្ឋ។

ក្រោយការប្រកាសលាលែងពី​តំណែងនាយករដ្ឋមន្ត្រី១ថ្ងៃគឺនៅថ្ងៃពុធ គណបក្សរីកចម្រើននិងគណបក្សឯក​រាជ្យបានជជែកគ្នាពីការបោះឆ្នោតជ្រើសរើសនាយករដ្ឋមន្ត្រីថ្មីនៅពេលខាងមុខ ប៉ុន្តែក្នុងស្ថានភាពបច្ចុប្បន្ននេះ ពួកគេបានជ្រើសរើសរដ្ឋមន្ត្រីក្រសួងកសិកម្មគឺលោក​ Sigurdur Ingi Johannssonn អាយុ៥៣ឆ្នាំឲ្យកាន់តំណែងនេះបណ្តោះអាសន្ន។

លោក Johannssonn ដែលត្រូវទទួលតំណែងជានាយករដ្ឋមន្ត្រីបណ្តោះអាសន្ននេះ លោកបង្ហាញក្តីសង្ឃឹមថា នឹងមានការបោះឆ្នោតជាផ្លូវការ​ជ្រើសរើសនាយករដ្ឋមន្ត្រីនៅចុងឆ្នាំនេះដោយការគ្រោងទុក។​ លោកថ្លែងថា លោកនឹងធ្វើការរួមគ្នាដើម្បីរក្សាលំនឹងស្ថិរភាពនយោបាយ។​

លោក​ Sigmundur David Gunnlaugsson​ អាយុ៤១ឆ្នាំជាប់ឆ្នោតជានាយករដ្ឋមន្ត្រីកាលពីឆ្នាំ២០១៣ ហើយតាមគម្រោងលោកនឹងផុតអាណត្តិឆ្នាំ២០១៧តែដោយសារលោកមានឈ្មោះក្នុងបញ្ជីអ្នកលាក់លុយនៅក្រៅប្រទេស ហើយប្រជាពលរដ្ឋ​ទាមទារឲ្យលោកលាលែងចេញពីតំណែង ទើបនាយករដ្ឋមន្ត្រីរូបនេះសម្រេចប្រកាសលា​ឈប់កាលពីថ្ងៃអង្គារដើមសប្តាហ៍នេះ៕