វិភាគ៖ តើមានមូលហេតុអ្វីនៅពីក្រោយការចាប់ខ្លួនឯកអគ្គរាជទូត លោក ស៊ុត ឌីណា?

ឯក​អគ្គរាជទូត​កូរ៉េខាងត្បូង លោក ស៊ុត ឌីណា ពេល​ត្រូវ​បាន​បញ្ជូ​នទៅពន្ធនាគារ​ព្រៃស(រូបថតដោយ លោក ហ៊ុយ ឧស្សាហ៍)

លោក ស៊ុត ឌីណា ដែលជាអតីតប្រធានចលនា​និស្សិតធ្វើ​បាតុកម្ម​ប្រឆាំង​រដ្ឋាភិបាល​របស់​គណ​បក្សប្រជាជនកម្ពុជានោះបាន​ចុះចូលជាមួយគណបក្សកាន់អំណាច​បានរយៈពេល៧ឆ្នាំ​គិត​មក​ដល់ពេលត្រូវចាប់ខ្លួន។

លោក ស៊ុត ឌីណា ពីមុនគឺមនុស្សស្និទ្ធនឹងសម្តេចក្រុមព្រះ។​ ប៉ុន្តែក្រោយពីចុះ​ចូល​ជាមួយ​គណបក្សប្រជាជនកម្ពុជា រដ្ឋាភិបាលបានតែងតាំងលោកឲ្យ​ធ្វើ​ជា​ឯកអគ្គរាជទូត​កម្ពុជា​ប្រចាំកូរ៉េខាងត្បូងគឺជាប្រទេសមួយដែលមានពលករខ្មែររាប់សែននាក់ធ្វើការ​នៅទីនោះ។

ក្នុងតួនាទីជាឯកអគ្គរាជទូតបានតែ២ឆ្នាំនិង១ខែអង្គភាពប្រឆាំងអំពើពុករលួយអះអាងថាលោក ស៊ុត ឌីណា មានលុយសល់ប្រ​ហែល៣លានដុល្លារ​ជាលុយកើនលើស​ពីលុយដែល​បាន​​ប្រកាស​ប្រាប់អង្គភាពថាមានប្រហែល៤លានដុល្លារពីមុនមកនោះ។

បន្ទាប់ពីអង្គភាពប្រឆាំងអំពើពុករលួយប្រកាសដូចនេះមជ្ឈដ្ឋានជាច្រើន​បាន​​​លើក​ជា​ចម្ងល់ថាគ្រាន់តែឯកអគ្គរាជទូតម្នាក់ធ្វើការបានតែ២ឆ្នាំមានលុយ​សល់ទៅ​៣លានដុល្លារចុះ​អ្នក​​កាន់តំណែងខ្លះ១០ឆ្នាំ ខ្លះ២០ឆ្នាំ និងខ្លះទៀតរហូត៣០ឆ្នាំនោះ តើសល់​លុយ​ប៉ុន្មាន​ទៅ? ​ទាំងនេះជាសំណួរដែលត្រូវបានគេលើកឡើង​នៅក្នុង​បណ្តាញ​សង្គម​ហ្វេស​ប៊ុក។

អ្នកលេងហ្វេសប៊ុកបានលើកឡើងថាអង្គភាពប្រឆាំងអំពើពុករលួយនៅមាន​ការងារ​ច្រើន​ទៀត​​ដែល​ត្រូវបើកការស៊ើបអង្កេត។

គេនៅចាំបានថាលោកនាយករដ្ឋម​ន្រ្តី ហ៊ុន សែន និង​ក្រសួងសេដ្ឋកិច្ច​ធ្លាប់ប្រកាសថាក្រសួងសង្គមកិច្ច​បាន​ចាយលុយខុសខ្ទង់រាប់លានដុល្លារ ប៉ុន្តែអង្គភាពប្រឆាំងអំពើ​ពុករលួយកាលណោះដូចជាមិនបានស៊ើបអង្កេតទេ។ ថ្មីៗនេះមន្រ្តីក្រសួងប្រៃសណីយ៍ម្នាក់ក៏ត្រូវបាន​អង្គ​ភាព​​ប្រឆាំងអំពើពុកលរលួយរកឃើញថាបានកឹបកេងថវិការដ្ឋរាប់ម៉ឺនដុល្លារ តែ​មន្រ្តីរូ​ប​នោះមិ​ន​ត្រូវបាន​អង្គភាពប្រឆាំងអំពើពុករលួយបញ្ជួនខ្លួនទៅតុលាការឡើយ។ ចំណែកករណីដែល​ព័ត៌មានអន្តរជាតិផ្សាយថារដ្ឋម​ន្រ្តី​ក្រសួងយុត្តិធម៌មានលាក់​លុយ​នៅ​ក្រៅ​ប្រ​ទេស​នោះ អង្គភាពប្រឆាំងអំពើពុករលួយអះអាងថាខ្លួនកំពុងស្រាវជ្រាវ​ព័ត៌មាន​នេះ​បន្ថែម​ទៀត​។

តើមានមូលហេតុអ្វីនៅពីក្រោយការចាប់ខ្លួនឯកអគ្គរាជទូត លោក ស៊ុត ឌីណា?

ចំណាត់ការរបស់អង្គភាពប្រឆាំងអំពើពុករលួយ​ទៅ​លើករណីលោក ស៊ុត ឌីណា ត្រូវ​បាន​​សាទរផងនិង​រិះគន់ផង។ រិះគន់ ត្រង់ថាអង្គភាពនេះហេតុអ្វីទើបតែ​ចាត់ការ​នៅ​ពេល​នេះ​ ឬក៏អង្គភាពនេះចង់​ស្តាមុខមាត់ឡើងវិញបន្ទាប់ពីមានការរិះគន់ខ្លាំងៗ​រឿងស្ថាប័ន​​របស់​​រដ្ឋ​មួយ​នេះទៅ​ខំចាត់ការ​តាមបណ្តឹង​របស់​មនុស្សមួយក្រុមដែលប្រឆាំងនឹង​​លោក កឹម សុខា?

អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី យល់ថារដ្ឋាភិបាលកំពុងតែ​សំដែងធ្វើឲ្យមានការចាប់អារម្មណ៍ដើម្បី​ស្ទង់ទឹកចិត្តមហាជន។ លោកប្រៀបធៀបថា៖ ”ង់ភ្លេងហ្នឹង[ពីមុនមក]គឺមានតែរដ្ឋាភិបាល តុលាការ និងសភាទេដែលពេលខ្លះ​លេងទៅក៏ពីរោះពេលខ្លះមិនពីរោះ។ ឥឡូវនេះហាក់ដូចជារដ្ឋាភិបាលចាប់ផ្តើមយកឧបករណ៍ថ្មី​មួយទៀត[ACU]ចូលទៅលេងបញ្ចូលឧបករណ៍ភ្លេងពីមុនមក។ វាជាពេលវេលាមួយដែលអាចឲ្យសាធារណៈជនតាមដានមើលថាការបញ្ចូលភ្លេងថ្មីទៀតតើពីរោះជាងមុនឬ​ពិបាកជាងមុនហើយអ្នកស្តាប់គេដើរចេញ

អ្នកវិភាគនិយាយថាការចាប់ខ្លួនលោក ស៊ុត ឌីណា នៅពេលនេះក៏ជាការគម្រាមដល់​មន្រ្តីគណបក្សប្រជាជនកម្ពុជា​ផ្សេងទៀតដែលចុះចូលជាមួយគណបក្សកាន់អំណាចនេះហើយចង់ដើរចេញពីគណបក្ស​នេះវិញ។

លោកនាយករដ្ឋមន្រ្តី ហ៊ុន សែន ថ្មីៗនេះក៏បានទម្លាក់ការទទួលខុសត្រូវ​នៃភាពអសកម្ម​របស់​មន្រ្តី​សាធារណៈក្រោមការដឹ​កនាំរបស់គណបក្សប្រជាជនកម្ពុជានោះថាពួកគេ​ជា​មនុស្ស​របស់​​​គណបក្សនៅក្រៅរដ្ឋាភិបាលទៅវិញ។ លោក ហ៊ុន សែន បា​ន​បញ្ជាឲ្យចាប់ខ្លួនមន្រ្តី​ទាំង​នោះដោយលោកចោទថាធ្វើការ​ងារ​​អសកម្មបែបនេះដើម្បីឲ្យខូចឈ្មោះ​រដ្ឋាភិបាល។

ក្រោយពីការថ្លែងរបស់លោកនាយករដ្ឋមន្រ្តីដែលគេហៅថា “ជាបុរសខ្លាំង” នោះ អង្គភាព​ប្រឆាំង​អំពើពុករលួយ​ក៏​ចាត់​ការ​ លោក ស៊ុត ឌីណា ដែលមិនមែនមាន​ដើមកំណើត​ជា​មន្រ្តី​គណ​បក្សប្រជាជនកម្ពុជា។

នាយកប្រតិបត្តិអង្គការ​តម្លាភាពកម្ពុជាលោក ព្រាប កុល ហៅលោក ស៊ុត ឌីណា ថា ”ជាជនរងគ្រោះ” ដោយសារអំពើរបស់ខ្លួន តែលោកថាអ្នកប្រព្រឹត្តអំពើពុករលួយច្រើនទៀតនៅមាន​សំណាងជាងលោក ឌីណា។ លោកមានប្រសាសន៍ថា៖ “មន្រ្តីពុករលួយនៅប្រទេសកម្ពុជាយើងមានច្រើន ហើយ​លោក ស៊ុត ឌីណា ជាជនរងគ្រោះបន្ទាប់ពីជនរងគ្រោះប្រហែល១២នាក់ទៀត ដូច្នេះ[ACU]មានការងារច្រើនទៀតដែលត្រូវធ្វើ

បើតាមលោក ព្រាប កុល ទោះបីជាអង្គភាពប្រឆាំងអំពើ​ពុករលួយ​ចាត់ការ​លោក ស៊ុត ឌីណា មួយ​ករណីនេះទៀតក៏ដោយតែលោកមិនរំពឹងថាកម្ពុជាមានចំណាត់ថ្នាក់ល្អជាងមុនផ្នែកប្រឆាំង​នឹង​​អំពើ​​ពុករលួយនោះទេ។

ចំណាត់ថ្នាក់អំពើពុករលួយនៅកម្ពុជាឆ្នាំ២០១៥ជាប់លេខបាតតារាងដែលមានន័យថានៅតែមាន​អំពើពុករលួយច្រើន។

លោកបណ្ឌិត មាស នី យល់ថាអង្គភាពប្រឆាំង​អំពើ​ពុករលួយគ្រាន់តែជាឧបករណ៏មួយរបស់​រដ្ឋាភិបាលដើម្បីបង្រ្កាបលើនរណាម្នាក់​ដែល​រដ្ឋាភិបាល​គិតថាទុកទៅមិនមានប្រយោ​ជន៍​តទៅទៀត។ លោកមានប្រសាសន៍ថា៖ “ACUគ្រាន់តែជាសត្វស្ទាំងមួយដែល​បង្កើត​មក​សម្រាប់​ឲ្យហើរមកចាប់​តែមាន់ណាដែលអាចចាប់បានឬក៏ប្រើ​សម្រាប់​កម្ចាត់មាន់ណាមួយដែលគេមិនពេញចិត្តឬស្ទាំងហ្នឹង​មិន​មើលគ្រប់​មាន់​ទាំងអស់ដែលទាក់ទិននឹងអំពើពុករលួយ។ ​យើងចាំមើលថាតើ​សត្វស្ទាំងមួយហ្នឹង​ត្រូវបាន​គេប្រើ​សម្រាប់​រក​យុត្តិធម៌​សង្គមឬសម្រាប់ធ្វើបាបតែលើក្រុមណាមួយ…

ចំណាត់ការកន្លងទៅរបស់អង្គភាពប្រឆាំងអំពើពុករលួយដែលធ្វើឲ្យមានការ​ចាប់​អារម្មណ៍នោះគឺ​​ការចាប់ខ្លួនឧត្តមសេនីយ៍ឯ​ក មឹក ដារ៉ា អគ្គលេខាធិការ​អាជ្ញាធ​រ​ជាតិ​ប្រឆាំង​គ្រឿងញៀននិងការចាប់​ខ្លួនលោក តុប ចាន់សេរីវុឌ្ឍ ព្រះរាជអាជ្ញាតុលាការខេត្តពោធិ៍សាត់ដែលធ្វើស្របពេល​ពលរដ្ឋ​កំពុង​តែចាប់អារម្មណ៍រឿងករណីស្លាប់មនុស្សរាប់រយនាក់នៅកោះពេជ្រ ប៉ុន្តែ​មិនមានមន្រ្តីរដ្ឋាភិបាល​ម្នាក់​ត្រូវបានដកចេញពីតំណែង៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ