ក្រសួងការពារជាតិរបស់កូរ៉េខាងត្បូងបានបញ្ជាក់នៅថ្ងៃចន្ទនេះថា មន្រ្តីចារកម្មយោធាជាន់ខ្ពស់ម្នាក់របស់កូរ៉េខាងជើងដែលមើលការខុសត្រូវលើការងារចារកម្ម បានរត់ទៅចុះចូលជាមួយកូរ៉េខាងត្បូង។
មន្រ្តីរូបនោះមិនទាន់ត្រូវបានគេបញ្ចេញឈ្មោះនៅឡើយទេ ប៉ុន្តែក្រសួងការពារជាតិនៅទីក្រុងសេអ៊ូលបានឱ្យដឹងថា លោកជាវរសេនីយ៍ឯកជាន់ខ្ពស់នៅក្នុងការិយាល័យទូទៅឈ្លបយកការណ៍ ដោយបានចាកចេញពីកូរ៉េខាងជើងកាលពីឆ្នាំមុន។ នេះបើយោងតាមបណ្ដាញផ្សាយព័ត៌មាន BBC ។
ទីភ្នាក់ងារព័ត៌មានយ៉ុនហាប់របស់កូរ៉េខាងត្បូងបានដកស្រង់សម្តីប្រភពមួយដែលជានិយាយថា វរសេនីយ៍ឯករូបនោះត្រូវបានអ្នកផ្សេងទៀតដែលបានចុះចូលជាមួយកូរ៉េខាងត្បូង មើលឃើញថាជា វរជន ។
មនុស្សជាង២៨០០០នាក់បានរត់ភៀសខ្លួនចេញពីកូរ៉េខាងជើងចាប់តាំងពីការបញ្ចប់សង្គ្រាមកូរ៉េ ប៉ុន្តែអ្នករត់ចោលជួរជាមន្ត្រីជាន់ខ្ពស់បែបនេះគឺកម្រមានណាស់។
កាលពីសប្តាហ៍មុន ជនជាតិកូរ៉េខាងជើង១៣នាក់ដែលធ្វើការក្នុងភោជនីយដ្ឋានមួយរបស់ប្រទេសកូរ៉េខាងជើងនៅបរទេសបានរត់ផ្ដាច់ខ្លួនជាក្រុម។
ទីភ្នាក់ងារព័ត៌មានយ៉ុនហាប់ក៏បានឲ្យដឹងដែរថា នៅពេលថ្មីនេះ អ្នកនយោបាយជាន់ខ្ពស់មួយចំនួនរបស់កូរ៉េខាងជើងបានរត់ចោលស្រុកនៅពេលដែលពួកគេធ្វើការនៅក្រៅប្រទេស ។ ភ្នាក់ងារព័ត៌មាននេះបានស្រង់សម្ដីរបស់មន្ត្រីរដ្ឋាភិបាលថា នេះជាសញ្ញាបង្ហាញពីប្រេះស្រាំនៃការដឹកនាំរបស់លោក គីម ជុងអ៊ុន៕
