តំណាងរាស្រ្តគណបក្សសង្រ្គោះជាតិមណ្ឌលសៀមរាប លោក អ៊ុំ សំអាន ដែលសកម្មនឹងបញ្ហាព្រំដែន ត្រូវបានចាប់ខ្លួននៅយប់រំលងអធ្រាត្រនេះ ក្នុងខេត្តសៀមរាប។
លោក អ៊ុំ សំអាន បានវិលត្រឡប់មកប្រទេសកម្ពុជាវិញ កាលពីព្រឹកថ្ងៃអាទិត្យ ក្រោយពីលោកបានចំណាយពេលជាង៧ខែនៅក្រៅប្រទេស នៅពេលបញ្ហាការផ្ទៀងផ្ទាត់ផែនទីកំពុងឡើងកម្តៅ និងស្របពេលលោកត្រូវបានប្រធានរដ្ឋសភា លោក ហេង សំរិន ដាក់ទណ្ឌកម្មមិនឲ្យចូលរួមប្រជុំសភាពេញអង្គចំនួន១៥ដង។
មុនពេលចាប់ខ្លួនលោក អ៊ុំ សំអាន សមត្ថកិច្ចបានឃាត់ខ្លួននិងឡោមព័ទ្ធផ្ទះរបស់អនុប្រធានគណៈកម្មាធិការប្រតិបត្តខេត្តរបស់គណបក្សសង្រ្គោះជាតិនិងជាសមាជិកក្រុមប្រឹក្សាខេត្ត លោក សុខ គឹមសេង។
លោក សុខ គឹមសេង ប្រាប់វីអូឌីនៅយប់អធ្រាត្រនេះថាលោកត្រូវបានប៉េអឹមប្រមាណ៤០នាក់មកព័ទ្ធផ្ទះនៅម៉ោងប្រមាណ៩យប់ ហើយសាកសួរព័ត៌មានពីលោក អ៊ុំ សំអាន។ លោកបន្តថាសមត្ថកិច្ចបានបង្ហាញរូបថតរបស់លោក អ៊ុំ សំអាន និងសួរពីការស្នាក់នៅរបស់ភ្ញៀវ។ លោកបញ្ជាក់បន្ថែមថានៅម៉ោងប្រមាណ១២និង៤៥នាទី សមត្ថកិច្ចបាននាំខ្លួនលោកទៅស្នងការខេត្ត ដោយពុំបាននិយាយអ្វីទាំងអស់ ហើយបញ្ជូនមកផ្ទះវិញភ្លាមៗ។
លោកបន្តថានៅពេលមកដល់ផ្ទះវិញ ជំនួយការរបស់លោក អ៊ុំ សំអាន បានហៅទូរស័ព្ទមកថាលោក អ៊ុំ សំអាន ត្រូវបានចាប់ខ្លួន។
បើតាម លោក សុខ គឹមសេង លោក អ៊ុំ សំអាន ត្រូវបានចាប់ខ្លួននៅម៉ោងជិត១យប់ នៅម្តុំផ្សារកណ្តាល នៅពេលលោកចុះដកលុយនៅទូរអេធីអឹមរបស់ធនាគារ។
លោកមានប្រសាសន៍ថា៖ “ម៉ោង៩និង៣០នាទី ចាប់ផ្ដើមធ្វើសកម្មភាពសាកសួរប្រពន្ធរបស់ខ្ញុំក្នុងការស្វែងរកតំណាងរាស្ដ្រ អ៊ុំ សំអានហ្នឹង ម៉ោង១០ឃាត់ខ្លួននិយាយរួមយើងអាចនិយាយថាគេឃាត់ខ្លួនព្រោះតែគេមិនឲ្យយើងទៅណាគេឲ្យខ្ញុំនៅក្នុងផ្ទះហ្នឹងគេមិនឲ្យទៅណា ដើម្បីធ្វើការសាកសួរហើយចាំជួបស្នងការ ប៉ុន្ដែដំបូងគេបានយករូបថតហ្នឹងឲ្យប្រពន្ធខ្ញុំមើលថាតើបានស្គាល់ម្នាក់ហ្នឹងអត់ ដែលមកស្នាក់នៅហ្នឹងអត់”។
ជំនួយការលោកអ៊ុំ សំអាន គឺលោក ឃូ ហាំងមាំង មានប្រសាសន៍ថា លោក អ៊ុំ សំអាន ត្រូវបានចាប់ខ្លួននៅម៉ោង១២និង៣៥នាទីយប់ នៅម្តុំផ្សារកណ្តាល នៅពេលលោកចុះដកលុយនៅទូរអេធីអឹមរបស់ធនាគារ។លោកមានប្រសាសន៍ថា៖ “ពីរនាក់ ស្លៀកពាក់ស៊ីវិលពេលដែលគាត់ដកលុយបានហើយចេញមកវិញគេសុំអញ្ជើញបងសួរចឹង ហើយគេចាប់គាត់រុញចូលក្នុងឡានដល់ពេលខ្ញុំបត់ឡានទៅតាមមិនទាន់ខ្ញុំថាប្រហែលគេយកទៅស្នងការវិញទៅអត់មានដាក់ខ្នោះទេ គេគ្រៀកដៃទាំងសងខាងគ្នាគេពីរនាក់ទៅដល់ស្នងការហ្នឹង បានគេដាក់ខ្នោះ”។
ចំណែកលោក សម រង្ស៊ី ប្រធានគណបក្សសង្រ្គោះជាតិ បានសរសេរនៅលើហ្វេសប៊ុករបស់លោកនៅរំលងអធ្រាត្រថាលោក អ៊ុំ សំអាន ត្រូវបានឃាត់ខ្លួនពីសំណាក់នគរបាលស្លៀកពាក់ស៊ីវិលនៅពេលលោកកំពុងដកលុយពីទូរអេធីអឹមធនាគារកាណាឌីយ៉ា នៅលើផ្លូវស៊ីសុវត្ថា ម្តុំផ្សារចាស់ សង្កាត់ស្វាយដង្គំ ក្រុងសៀមរាប។
វីអូឌីមិនទាន់អាចទាក់ទងសមត្ថកិច្ចដើម្បីសុំការឆ្លើយតបបានភ្លាមៗនៅឡើយទេ។
មុនពេលចាប់ខ្លួន លោក អ៊ុំ សំអាន ប្រាប់វីអូឌីថាលោកមិនភ័យខ្លាចនឹងការចាប់ខ្លួននោះទេ។ កន្លងទៅ រដ្ឋាភិបាលព្រមានចាត់វិធានការផ្លូវច្បាប់ប្រឆាំងនឹងនិយាយថារដ្ឋាភិបាលប្រើប្រាស់ផែនទីក្លែងក្លាយ។ លោក អ៊ុំ សំអាន ត្រូវបានលើកឡើងថាជាមនុស្សម្នាក់អាចរដ្ឋាភិបាលចាត់វិធានការ។
លោក អ៊ុំ សំអាន ឲ្យដឹងទៀតថាលោកនឹងបន្តសិក្សាបញ្ហាព្រំដែនជាមួយប្រជាពលរដ្ឋខ្មែរនៅក្រៅប្រទេស ដោយលោកថាការងារនេះនឹងបញ្ចប់ក្រោយការបោះឆ្នោតឆ្នាំ២០១៨។ លោកបញ្ជាក់ថាលោកនឹងស្នើឲ្យមានការសើរើបញ្ហាព្រំដែនឡើងវិញ ប្រសិនបើគណបក្សសង្រ្គោះជាតិឈ្នះការបោះឆ្នោត។
លោកមានប្រសាសន៍ថា៖ “គ្រាន់តែសិក្សាពីបច្ចេកទេសទាក់ទងនឹងបញ្ហាព្រំដែននិងឯកសារផ្សេងៗដែលទាក់ទងនឹងបញ្ហា ដើម្បីត្រៀមខ្លួននៅពេលដែលគណបក្សឈ្នះឆ្នោតឆ្នាំ២០១៨ យើងនឹងអាចសើរើការបោះបង្គោលព្រំដេនជាមួយវៀតណាម”។ លោកបញ្ជាក់ថាឯកសារទាំងនោះ លោកបានមកពីក្នុងស្រុកនិងក្រៅស្រុក នៅពេលលោកស្នាក់នៅក្រៅប្រទេស រួមមានពីប្រទេសបារាំង សហរដ្ឋអាមេរិក បណ្ណាល័យសភាអាមេរិកនិងអង្គការសហប្រជាជាតិជាដើម។
កន្លងទៅ ប្រធានគណៈកម្មាធិការកិច្ចការព្រំដែនកម្ពុជា លោក វ៉ា គឹមហុង បានអះអាងថាលោក អ៊ុំ សំអាន បានញុះញង់ឲ្យមានអស្ថិរភាពសង្គមនិងមិនអាចអត់ឱនបាននោះទេ៕ ដោយ បូ សាវី និងស៊ុន ណារិន