ប្រទេសដែលមានសេដ្ឋកិច្ចរីកចម្រើនឬហៅG7 សម្តែងការព្រួយបារម្ភពីបញ្ហាជម្លោះដែនសមុទ្រនៅអាស៊ី ខណៈពួកគេកំពុងយកចិត្តទុកដាក់តាមដាមមហិច្ឆតាចិនក្នុងការគ្រប់គ្រងដែនសមុទ្រ។
ទីក្រុងប៉េកាំងអះអាងថាដែនសមុទ្រចិនភាគខាងត្បូងស្ទើរទាំងអស់ជារបស់ខ្លួនបើទោះជាតំបន់ទាំងនោះកំពុងមានជម្លោះ ហើយមានការទាមទារចំណែកពីប្រទេសព្រុយណេ ម៉ាឡេស៊ី វៀតណាម តៃវ៉ាន់ និងហ្វីលីពីនក៏ដោយ គឺចិននៅតែបន្តសាងសង់សំណង់នៅលើកោះនៅក្នុងសមុទ្រដែលកំពុងមានជម្លោះទាំងនោះ។
ចំណែកជប៉ុនក៏កំពុងមានជម្លោះនៅដែនសមុទ្រខាងកើតជាមួយចិនដែរ ហើយកោះនោះចិនបញ្ជាក់ថាជារបស់ខ្លួន។
រដ្ឋមន្ត្រីការបរទេសទាំង៧នៃG7ចេញសេចក្តីថ្លែងការណ៍រួមថា ពួកគេកំពុងបារម្ភពីស្ថានភាពនៅសមុទ្រចិនខាងត្បូងនិងសមុទ្រខាងកើតដែលកំពុងគំរាមកំហែងដល់មូលដ្ឋានគ្រឹះនៃការគ្រប់គ្រងសន្តិភាព។ សេចក្តីថ្លែងការណ៍ធ្វើឡើងបន្ទាប់ពីប្រទេសទាំងនេះបើកកិច្ចប្រជុំ២ថ្ងៃនៅទីក្រុងហ៊ីរ៉ូស៊ីម៉ា។ នេះបើតាមសារព័ត៌មាន Channel News Asia។
ប្រទេសនៅអាស៊ីអាគ្នេយ៍និងរដ្ឋធានីវ៉ាស៊ីនតោនកំពុងមានការព្រួយបារម្ភខ្លាចចិនដាក់ពង្រាយយោធានៅដែនសមុទ្រកំពុងមានជម្លោះនៅដែនសមុទ្រខាងត្បូងដែលបង្កភាពតានតឹងកើនឡើង។
ប្រទេសG7ទាំងនោះរួមមាន កាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាមេរិក៕