ឯកអគ្គរដ្ឋទូតអាមេរិកជិះឧទ្ធម្ភាគចក្រមើលព្រៃឡង់ជាមួយរដ្ឋមន្ត្រី​បរិស្ថាន​

ឯកអគ្គរដ្ឋទូតអាមេរិកប្រចាំប្រទេសកម្ពុជាលោក William A. Heidt នាពេល​កន្លង​ទៅ

ឯកអគ្គរដ្ឋទូតអាមេរិកប្រចាំ​ប្រទេស​កម្ពុជា​លោក William A. Heidt នឹង​​ចូលរួម​ជិះឧទ្ធម្ភាគចក្រមើលព្រៃឡង់ជាមួយ​មន្ត្រី​កម្ពុជា ដោយបំណងនៃ​ដំណើរតាមឧទ្ធម្ភាគចក្រនេះត្រូវ​គេ​​អះអាង​ថា​ដើម្បីលើកកម្ព​ស់ការយល់ដឹងពី​ការបំផ្លាញព្រៃឈើ និង​បង្កើនការគាំទ្ររបស់រដ្ឋាភិបាលក្នុងការការពារព្រៃឈើ។

ក្នុង​សេចក្ដី​ប្រកាស​ព័ត៌មាន​ចេញផ្សាយ​នៅ​ថ្ងៃ​អង្គារ​នេះ ស្ថានទូតអាមេរិកប្រចាំ​ប្រទេស​កម្ពុជា​បាន​ឲ្យ​ដឹង​ថា នៅក្នុងដំណើរមើល​ព្រៃឡង់​តាម​ឧទ្ធម្ភាគចក្រនេះ​មានការ​ចូលរួម​ពី​លោក សាយ សំអាល់ រដ្ឋមន្រ្តីក្រសួងបរិស្ថាន  លោក សក់ សេដ្ឋា រដ្ឋលេខាធិការក្រសួងមហាផ្ទៃ និងលោក ឆេង គឹមស៊ុន អគ្គនាយករដ្ឋបាល​ព្រៃឈើនៃក្រសួងកសិកម្ម រុក្ខាប្រម៉ាញ់ និងនេសាទ។ តំណាងនៃទីភ្នាក់ងារសហរដ្ឋអាមេរិក​សំរាប់ការអភិវឌ្ឍន៍​អន្តរជាតិ (USAID) ក៏ចូលរួមផងដែរ ជាផ្នែកមួយ​នៃគំរោងគាំទ្រព្រៃឈើ និងជីវសាស្រ្តចំរុះ ដែលអនុវត្ត​ដោយ​អង្គការ Winrock International ។

សេចក្ដី​ប្រកាស​ព័ត៌មាន​បញ្ជាក់​ថា បំណងនៃដំណើរតាមឧទ្ធម្ភាគចក្រនេះគឺដើម្បីលើកកម្ពស់​ការយល់ដឹងលើការបំផ្លាញព្រៃឈើ និង​បង្កើនការគាំទ្ររបស់រដ្ឋាភិបាល ក្នុងការការពារព្រៃឈើ។ សេចក្ដី​ប្រកាស​ព័ត៌មាន​បន្ត​ថា ការទៅ​ជួបគ្នានៃផ្នែកក្រសួងបរិស្ថាន ក្រសួងកសិកម្ម​ រុក្ខាប្រម៉ាញ់ និងនេសាទ ហើយនិងក្រសួងមហាផ្ទៃជួយបង្ហាញឲ្យ​ឃើញការគាំទ្រ និងកិច្ចសហប្រតិបតិ្ត​ការ​អន្តរក្រសួងក្នុងការការពារព្រៃឡង់។

ស្ថានទូត​អាមេរិកបញ្ជាក់​ថា ​លោក ​ William A. Heidt នឹង​ត្រឡប់​មកភ្នំពេញ​​វិញ​នៅថ្ងៃ​ចន្ទ ទី១៨ ខែ​មេសា ឆ្នាំ ២០១៦ ដោយចុះចត​នៅម៉ោង ១១:៣០ នាទីព្រឹក នៅសណ្ឋាគារ Sofitel Phnom Penh Phokeethra Hotel។

សេចក្ដី​ប្រកាសព័ត៌មាន​ឲ្យដឹង​ដែរ​ថា បន្ទាប់ពីចុះចតនៅរាជធានីភ្នំពេញ លោក Heidt និងមន្រ្តីកម្ពុជានឹងធ្វើសន្និសីទសារ​ព័ត៌មានខ្លីមួយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered