រដ្ឋាភិបាលសម្រេចបង្កើតគណៈកម្មការអន្តរក្រសួងមួយ ដែលមានតួនាទីសិក្សាពីលទ្ធភាពបង្កើតឧទ្យានជាតិសមុទ្រកោះរុង ដែលមានទីតាំងនៅតំបន់កោះរុង ខេត្តព្រះសីហនុ។
នៅក្នុងសេចក្តីសម្រេចមួយ ចុះថ្ងៃទី៣ខែមីនា ហើយវីអូឌីទើបតែទទួលបាន រដ្ឋាភិបាលបានបញ្ជាក់ថាសមាសភាពនៃគណៈកម្មការនេះមានរដ្ឋមន្រ្តីក្រសួងបរិស្ថាន លោក សាយ សំអាល់ ជាប្រធាន និងលោក តឹករ៉េត សំរេច រដ្ឋលេខាធិការទីស្តីការគណៈរដ្ឋមន្រ្តីជាអនុប្រធាន។ សមាសភាពជាសមាជិកក៏មានអភិបាលខេត្តព្រះសីហនុ រដ្ឋលេខាធិការក្រសួងរ៉ែនិងថាមពល ក្រសួងធនធានទឹក ក្រសួងកសិកម្ម ក្រសួងមហាផ្ទៃនិងក្រសួងដែនដីផងដែរ។
បើតាមសេចក្តីសម្រេច គណៈកម្មការនេះនឹងសិក្សាស្រាវជ្រាវពីសារៈសំខាន់ខាងផ្នែកជីវចម្រុះ សណ្ឋានដី ភូគព្ភសាស្រ្ត ប្រវត្តិសាស្រ្ត វប្បធម៌ ប្រពៃណី សេដ្ឋកិច្ចនិងសង្គម ដែលជាសក្តានុពលសម្រាប់ការរៀបចំបង្កើតឧទ្យានជាតិសមុទ្រកោះរុង។ គណៈកម្មការក៏សិក្សាកំណត់ព្រំប្រទល់និងធ្វើផែនទីសម្រាប់ការបង្កើតឧទ្យានជាតិសមុទ្រកោះរុង។ គណៈកម្មការនេះនឹងសិក្សា វាយតម្លៃ កំណត់និងបែងចែកតំបន់គ្រង់គ្រងឲ្យស្របតាមច្បាប់ស្តីពីតំបន់ការពារធម្មជាតិ។
កោះរុងស្ថិតនៅចម្ងាយ២៥គីឡូម៉ែតពីឆ្នេរសមុទ្រខេត្តព្រះសីហនុ។ វាមានផ្ទៃដី៧៨គីឡូម៉ែត្រការ៉េនិងមានប្រវែងពីជើងទៅត្បូងប្រហែល១០គីឡូម៉ែត្រ។ ក្រុមហ៊ុនរ៉ូយ៉ាល់គ្រុបកំពុងតែសាងសង់សណ្ឋាគារលំដាប់ផ្កាយ៥នៅលើកោះរុងនេះ ដែលមានតម្លៃទៅដល់៣០លានដុល្លារអាមេរិក៕