ក្រុមអ្នកបរិស្ថានប្រកាសថានឹងបន្តយុទ្ធនាការប្រឆាំងក្រុមហ៊ុនស្រាបៀរអង្គរ ដោយពួកគេអះអាងថាក្រុមហ៊ុននោះមានជាប់ពាក់ព័ន្ធជាមួយនឹងការសាងសងទំនប់វារីអគ្គិសនី ដន សាហុង នៅប្រទេសឡាវ ដែលធ្វើប៉ះពាល់ដល់ធនធានធម្មជាតិនិង ពលរដ្ឋតាមដងទន្លេមេគង្គរាប់ម៉ឺននាក់។
នៅព្រឹកថ្ងៃទី១៩ខែមេសានេះក្រុមយុវជនការពារបរិស្ថាននិងអ្នករងផលប៉ះពាល់ពីការសាងសងទំនប់វារីអគ្គិសនីធ្វើសន្និសិទសារព័ត៌មានមួយក្នុងរាជធានីភ្នំពេញស្ដីពីការឆ្លើយតបរបស់ក្រុមហ៊ុនស្រាបៀរអង្គរដែលថាមិនមានជាប់ពាក់ព័ន្ធនឹងការសាងសងទំនប់វារីអគ្គិសនី។
ប្រធានយុវជនការពារសង្គមនិងបរិស្ថានលោក ជុំ ហួត ដែលអះអាងថាបានចុះធ្វើការស្រាវជ្រាវផ្ទាល់ក្នុងតំបន់រងផលប៉ះពាល់ បានឲ្យដឹងថាពួកគេនឹងបន្តយុទ្ធនាការគ្រប់ទីកន្លែងដើម្បីជំរុញឲ្យពលរដ្ឋឈប់គាំទ្រនិងផឹកស្រាបៀរអង្គរ បើក្រុមហ៊ុនស្រាបៀរអង្គរមិនព្រមដកភាគហ៊ុនពីការសាងសងទំនប់វារីអគ្គិសនី ដន សាហុង។ លោកបន្ថែមថាការសាងសង់ទំនប់នោះធ្វើឲ្យប៉ះពាល់ច្រើនដល់ធនធានធម្មជាតិដូចជា ត្រី ផ្សោត មានការថយចុះ និងបាត់បង់ធនធានទឹកសម្រាប់ប្រជាពលរដ្ឋប្រើប្រាស់។
លោកបន្ថែមថា៖ “នៅពេលដែលផ្អាកការសាងសង់ គាត់ទៅរកភាគហ៊ុនថ្មីវាយូរអញ្ចឹងយើងអាចមានកំលាំងគ្រប់គ្រាន់ក្នុងការទប់ស្កាត់ម្ដងទៀត ហ្នឹងហើយយុទ្ធនាការដែលយើងធ្វើ យើងធ្វើលើកទីមួយនៅខេត្តសៀមរាបថ្ងៃទី២០ស្អែក។ បន្ទាប់មកយើងធ្វើនៅរដ្ឋសភា ហើយបន្តទៅធ្វើនៅទីលានប្រជាធិបតេយ្យ។ បន្ទាប់មកទៀតយើងទៅធ្វើនៅប្រទេសក្នុងតំបន់ដូចជាទៅធ្វើយុទ្ធនាការនៅថៃហ្នឹង យើងបន្តរកភស្ដុតាងបន្ថែមទៀតពីលោក ហ្គោណាន គា ប្រធានក្រុមហ៊ុនស្រាបៀរអង្គរ ដែលគាត់ជាប់ភាគហ៊ុននឹងទំនប់វារីអគ្គិសនី ដន សាហុង ប្រទេសឡាវ”។
ប្រធានសម្ព័ន្ធប្រជានេសាទកម្ពុជាលោក ឡុង សូចែត បានថ្លែងថាក្នុងលិខិតឆ្លើយតបរបស់ក្រុមហ៊ុនស្រាបៀរអង្គរដែលថាមិនជាប់ពាក់ព័ន្ធនឹងទំនប់វារីអគ្គិសនីនោះហាក់មិនពិតប្រាកដនៅឡើយ ដោយលោកអះអាងថាក្រុមហ៊ុនស្រាបៀរអង្គរនិងក្រុមហ៊ុនមេហ្គាហ្វឺស ដែលដាក់ហ៊ុនជាមួយនឹងការសាងសង់ទំនប់វារីអគ្គិសនី ដន សាហុង ជាម្ចាស់តែមួយ។ លោលបន្ថែមថាការឆ្លើយតបនោះគ្រាន់តែជាការគំរាមកំហែងនិងព្រមានឲ្យយុវជនបញ្ឈប់ការតវ៉ា។
វីអូឌីមិនអាចទាក់ទងសុំការឆ្លើយតបពីតំណាងក្រុមហ៊ុនស្រាបៀរអង្គរបានទេ។ ទោះបីជាយ៉ាងណាក្នុងលិខិតរបស់ក្រុមហ៊ុនស្រាបៀរអង្គរមួយចុះថ្ងៃទី០២ ខែមីនា ឆ្នាំ២០១៦ ឆ្លើយតបទៅនឹងសេចក្ដីថ្លែងការណ៍របស់យុវជន ឲ្យដឹងថាក្រុមហ៊ុនស្រាបៀរអង្គរនិងក្រុមហ៊ុនមេហ្គាហ្វឺសជាក្រុមហ៊ុនពីរផ្សេងគ្នា ដូច្នេះក្រុមហ៊ុនស្រាបៀរអង្គរមិនមានជាប់ពាក់ព័ន្ធនឹងការសាងសងទំនប់វារីអគ្គិសនីនោះទេ។ ក្នុងលិខិតឆ្លើយតបនោះក្រុមហ៊ុនក៏ជំរុញឲ្យយុវជនទាំងនោះបញ្ឈប់ជាបន្ទាន់នូវការសកម្មភាព ញុះញង់ឲ្យពលរដ្ឋធ្វើពហិការឈប់ផឹកស្រាបៀរអង្គរ។
នាយកប្រតិបត្តិនៃអង្គការមិនមែនរដ្ឋាភិបាលលោក តឹក វណ្ណារ៉ា មានប្រសាសន៍ថាបើក្រុមហ៊ុនស្រាបៀរអង្គរអះអាងថាខ្លួនមិនមានជាប់ពាក់ព័ន្ធនឹងការសាងសងទំនប់វារីអគ្គិសនីនោះ លុះត្រាតែក្រុមហ៊ុននោះធ្វើការបង្ហាញជាឯកសារជាក់លាក់មួយទៅកាន់សាធារណជននិងអង្គការសង្គមស៊ីវិល។ លោកបន្ថែមថាការបន្តឬក៏បញ្ឈប់ការតវ៉ារបស់ក្រុមយុវជនទាំងនោះគឺជាសិទ្ធិសេរីភាពរបស់ពួកគាត់ក្នុងការការពារបរិស្ថាន។
លោកបន្ថែមថា៖ “យើងនឹងសរសេរលិខិតជាផ្លូវការទៅក្រុមហ៊ុនមេហ្គាហ្វឺសឲ្យមានការបញ្ជាក់ពីភាពមិនពាក់ព័ន្ធរវាងក្រុមហ៊ុនស្រាបៀរអង្គរនិងក្រុមហ៊ុនមេហ្គាហ្វឺសក្នុងករណីដែលយើងទទួលចំលើយថាមិនទាក់ទងគ្នាទេ យើងអត់មានយុទ្ធនាការអ្វីជាមួយនឹងក្រុមហ៊ុនស្រាបៀរអង្គរទេ។ តែក្នុងករណីដែលគេឆ្លើយថាពាក់ព័ន្ធនោះក្រុមហ៊ុនស្រាបៀរអង្គរត្រូវតែទទួលខុសត្រូវចំពោះការសាងសងទំនប់វារីអគ្គិសនី ដន សាហុង”។
គួរបញ្ជាក់ថាកាលពីចុងឆ្នាំ២០១៥ក្រុមយុវជនដែលអះអាងថាបានសិក្សាស្រាវជ្រាវពីផលប៉ះពាល់ពីការសាងសង់ទំនប់វារីអគ្គិសនី ដន សាហុង នោះបានធ្វើការតវ៉ាជាបន្តបន្ទាប់ជាពិសេសនៅខាងមុខក្រុមហ៊ុនស្រាបៀរអង្គរ ដើម្បីទាមទាឲ្យក្រុមហ៊ុនដកភាគហ៊ុនពីការសាងសង់ទំនប់វារីអគ្គិសនីដែលចម្រូងចម្រាស់នេះ ដោយពួកគេអះអាងថាបានធ្វើឲ្យប៉ះពាល់ដល់ពលរដ្ឋជិត៦លាននាក់៕