ប្រធានសហភាពចលនាកម្មករកម្ពុជាលោក ប៉ាវ ស៊ីណា ឲ្យដឹងថាលោកនឹងចូលបំភ្លឺនៅតុលាការនៅព្រឺកថ្ងៃស្អែកតាមដីកាកោះរបស់សាលាដំបូងរាជធានីភ្នំពេញពាក់ព័ន្ធនឹងរឿងក្លែងលិខិតនិងផ្ដល់ព័ត៌មានមិនពិត។
បើតាមសេចក្ដីជូនដំណឹងរបស់សហភាពចលនាកម្មករចុះថ្ងៃទី២០ ខែមេសា នេះបានឲ្យដឹងថាលោក ប៉ាវ ស៊ីណា នឹងចូលខ្លួនទៅកាន់តុលាការនៅម៉ោង៩ព្រឹកថ្ងៃទី២១ខែមេសា។
គួរបញ្ជាក់ថាកាលពីថ្ងៃទី២២ ខែមីនា ព្រះរាជអាជ្ញារងនៃសាលាដំបូងរាជធានីភ្នំពេញលោក ខាំ សុផារី កោះអញ្ជើញលោក ប៉ាវ ស៊ីណា ឲ្យចូលបំភ្លឺនៅតុលាការនៅម៉ោង៤និង៣០នាទី ដើម្បីសាកសួរពីសំណុំរឿងក្លែងលិខិតនិងផ្តល់ព័ត៌មានមិនពិតតាមបណ្តឹងរបស់ឈ្មោះ គង់ សុភ័ក្រ្ត។ លោក ប៉ាវ ស៊ីណា បានដាក់ពាក្យស្នើសុំសាលាដំបូងរាជធានីភ្នំពេញពន្យារពេលចូលបំភ្លឺ ដោយលោកអះអាងថាមិនមានពេលត្រៀមខ្លួនគ្រប់គ្រាន់។
លោក ប៉ាវ ស៊ីណា ធ្លាប់បានអះអាងប្រាប់វីអូឌីថា លោកមិនបានដឹងថាលោកបានប្រព្រឹត្តករណីដែលត្រូវបានចោទប្រកាន់នៅពេលណានោះទេ ហើយលោកក៏មិនដែលស្គាល់បុគ្គលដើមបណ្តឹងឈ្មោះ គង់ សុភ័ក្រ្ក នោះដែរ។
បើតាមលោក ប៉ាវ ស៊ីណា សព្វថ្ងៃលោកកំពុងជាប់បណ្តឹងចំនួន២ ដោយលោកថាមួយជាប់ពាក់ព័ន្ធនឹងសំណុំរឿងហិង្សានៅផ្លូវវេងស្រេងកាលដើមឆ្នាំ២០១៤ និងបណ្តឹងមួយទៀតទាក់ទងនឹងបទញុះញង់ឲ្យមានអំពើហិង្សានៅមុខរោងចក្រ Agile Sweater ក្នុងខេត្តកំពង់ស្ពឺ កាលពីខែមករា ឆ្នាំ២០១៦៕
