អង្គការអ្នករាយការណ៍គ្មានព្រំដែន(Reporters Without Borders)បានចំណាត់ថ្នាក់សេរីភាពសារព័ត៌មានសម្រាប់ប្រទេសកម្ពុជាប្រសើរជាងប្រទេសទាំងអស់ជាសមាជិកអាស៊ាន តែសេរីភាពនេះស្ថិតនៅក្នុងស្ថានភាពអាក្រក់ដដែល។
នៅក្នុងរបាយការណ៍ស្តីពីសន្ទស្សន៍សេរីភាពសារព័ត៌មានឆ្នាំ២០១៦ចេញផ្សាយនៅថ្ងៃពុធនេះ អង្គការអ្នករាយការណ៍គ្មានព្រំដែនបានចំណាត់ថ្នាក់ប្រទេសចំនួន១៨០នៅក្នុងពិភពលោក អំពីសន្ទស្សន៍សេរីភាពសារព័ត៌មាន ដោយផ្អែកលើសេរីភាពនិងសុវត្ថិភាពរបស់អ្នកសារព័ត៌មាន ចំនួនប្រព័ន្ធផ្សព្វផ្សាយ ឯករាជ្យភាពនិងបរិយាកាសបំពេញតួនាទីរបស់អ្នកសារព័ត៌មាន។ បើតាមសន្ទស្សន៍នោះ កម្ពុជាទទួលចំណាត់ថ្នាក់លេខ១២៨សម្រាប់សេរីភាពសារព័ត៌មានក្នុងឆ្នាំ២០១៥ ដែលធ្លាក់ពីលេខ១៣៩សម្រាប់សេរីភាពសារព័ត៌មានក្នុងឆ្នាំ២០១៤។
អង្គការអ្នករាយការណ៍គ្មានព្រំដែនចាត់កម្រិតនៃស្ថានភាពសារព័ត៌មានជា៥កម្រិតគឺស្ថានភាពល្អ ស្ថានភាពដែលអាចទទួលយកបាន កម្រិតមានបញ្ហាគួរឲ្យកត់សម្គាល់ ស្ថានភាពអាក្រក់ និងស្ថានភាពអាក្រក់ខ្លាំង ។ កម្ពុជាទទួលបានចំណាត់ថ្នាក់ប្រសើរជាងប្រទេសឥណ្ឌូនេស៊ី(ទទួលចំណាត់ថ្នាក់១៣០) ថៃ(១៣៦) មីយ៉ាន់ម៉ា(១៤៣) ហ្វីលីពីន(១៣៨) ម៉ាឡេស៊ី(១៤៦) សិង្ហបុរី(១៥៤)និងព្រុយនេ(១៥៥)ឡាវ(១៧៣)និងវៀតណាម(១៧៥)។ កាលពីឆ្នាំមុន កម្ពុជាឈរនៅលំដាប់ល្អជាងប្រទេសហ្វីលីពីន មីយ៉ានម៉ា ម៉ាឡេស៊ី សិង្ហបុរី ឡាវនិងវៀតណាមតែប៉ុណ្ណោះ។ ចំណែកប្រទេសដែលទទួលបានចំណាត់ថ្នាក់ល្អជាងគេ រួមមានប្រទេសហ្វាំងឡង់ ហូឡង់និងន័រវ៉េ។
បើតាមរបាយការណ៍នោះ ប្រព័ន្ធផ្សព្វផ្សាយនៅកម្ពុជាត្រូវបានគ្រប់គ្រងដោយរដ្ឋាភិបាល។ របាយការណ៍បន្តថាការបរិហាកេរ្តិ៍និងការធ្វើឲ្យប៉ះពាល់រូបភាពប្រទេសជាញឹកញយត្រូវបានចោទប្រកាន់។ របាយការណ៍ឲ្យដឹងទៀតថារដ្ឋាភិបាលរបស់លោកនាយករដ្ឋមន្រ្តី ហ៊ុន សែន កំពុងតែរៀបចំច្បាប់ឧក្រិដ្ឋកម្មតាមប្រព័ន្ធអ៊ិនធើណែត។
អ្នកនាំពាក្យអង្គភាពព័ត៌មាននិងប្រតិកម្មរហ័សរបស់ទីស្តីការគណៈរដ្ឋមន្ត្រី លោក ទិត្យ សុធា បានបដិ សេធមិនអត្ថាធិប្បាយលើបញ្ហានេះ ដោយលោកថាមិនទាន់បានឃើញរបាយការណ៍។
អគ្គលេខាធិការក្លឹបអ្នកកាសែតកម្ពុជា លោក ពុយ គា មានប្រសាសន៍ថាសេរីភាពអ្នកសារព័ត៌មាននៅកម្ពុជាមិនល្អពេកនិងមិនអន់ពេកនោះទេ បើធៀបនឹង១៨០ប្រទេស។ លោកបន្តថាដើម្បីឲ្យសេរីភាពសារព័ត៌មានល្អប្រសើរជាងនេះ លុះត្រាតែអ្នកសាព័ត៌មាននិងរដ្ឋាភិបាលអនុវត្តការងាររបស់ខ្លួនប្រកបដោយភាពចាស់ទុំ។ លោកមានប្រសាសន៍ថា៖ ”ទំាងសារព័ត៌មាន ទំាងរដ្ឋាភិបាល ទំាងអស់ឲ្យចាស់ទុំ មានន័យថាឲ្យយល់គ្នាទៅវិញទៅមក ហើយការសរសេររបស់យើងឲ្យគោរពតាមវិជ្ជាជីវៈមិនមានបញ្ហាទេ។ កន្លងមកមានសារព័ត៌មានរបស់យើងមួយចំនួនតូចគឺថាធ្វើឲ្យវាមិនបានគោរពតាមវិជ្ជាជីវៈនៃក្រមសីលធម៌បានល្អ អញ្ចឹងហើយបានធ្វើឲ្យមានការប្រទំាងប្រទើសនៅក្នុងការផ្សាយរបស់ខ្លួនវាធ្វើឲ្យប៉ះពាល់ដល់អ្នកដទៃ ឬមួយក៏គាត់យកទៅមិនបានគ្រប់ជ្រុងជ្រោយ។ ដោយឡែកខាងអាជ្ញាធរ ពេលខ្លះគាត់អត់ទាន់បានយល់ពីវិជ្ជាជីវៈអ្នកសារព័ត៌មាន គាត់យល់ថាអ្នកសារព័ត៌មានគឺសរសេរខុស សរសេរអី គាត់មានការប្តឹង ប៉ុន្តែគាត់មិនបានយោងទៅលើច្បាប់សារព័ត៌មានថាត្រូវឲ្យកែតម្រូវសិន មុននឹងគាត់ប្រតិកម្មប្តឹង”។
គួរបញ្ជាក់ថាកាលពីថ្ងៃទី១៦ខែមីនា លោកនាយករដ្ឋមន្រ្តី ហ៊ុន សែន បានថ្លែងថាកម្ពុជាពិតនិងកម្ពុជាលើបណ្តាញសារព័ត៌មានខុសគ្នា ដោយលោកបានរិះគន់សារព័ត៌មាននិងអ្នកនយោបាយមួយចំនួនថាសរសេរនិងនិយាយធ្វើឲ្យខូចកេរ្តិ៍ឈ្មោះកម្ពុជា។ លោកមានប្រសាសន៍ថា៖ “ប៉ុន្តែនេះដោយសារវាជាកម្ពុជាពិត ទើបខ្ញុំនិយាយលេងសើច។ បើសិនជាកម្ពុជាលើទំព័រលើសារព័ត៌មាន គឺយើងគ្មានឱកាសនឹងលេងសើចទេ ព្រោះវាជាឋាននរកលោកិយរបស់អ្នកនយោបាយខ្លះដែលដើរសំអុយកេរ្តិ៍ឈ្មោះកម្ពុជា ស្របនឹងសារព័ត៌មានដែលមិនសុចរិតភាព តែហ្នឹងជាសិទ្ធិបញ្ចេញមតិរបស់គេទេ”៕ ដោយ ស៊ុន ណារិន និងណាត សុភាព
