រដ្ឋមន្ត្រីការពារជាតិបារាំងប្រកាសថា ដល់ពេលហើយដែលសម្ព័ន្ធមិត្តត្រូវការរួមគ្នាវាយប្រហារ ដើម្បីលុបបំបាត់ពួកក្រុមរដ្ឋឥស្លាមនៅក្នុងប្រទេសស៊ីរីនិងអ៊ីរ៉ាក់ ដើម្បីផលប្រយោជន៍សន្តិសុខពិភពលោក។
រដ្ឋមន្ត្រីការពារជាតិបារាំងលោក Jean-Yves Le Drian ថ្លែងទៅកាន់អ្នកសារព័ត៌មាននៅថ្ងៃព្រហស្បតិ៍នេះ បញ្ជាក់ថា ពេលនេះជាលក្ខខណ្ឌល្អប្រសើរណាស់ ដែលធ្វើការរួមគ្នាដើម្បីលុបបំបាត់ក្រុមរដ្ឋឥស្លាមនៅក្នុងប្រទេសស៊ីរីនិងអ៊ីរ៉ាក់។ នេះបើតាមសារព័ត៌មាន Channel News Asia។
លោក Jean-Yves Le Drian ថ្លែងថា តាមដែលលោកតាមដាន ពួករដ្ឋឥស្លាមកំពុងប្រឈមការគំរាមកំហែង។ លោកបញ្ជាក់ថាចាប់តាំងពីក្រុមរដ្ឋឥស្លាមចូលវាយកាន់កាប់ផ្នែកខ្លះនៃទឹកដីស៊ីរីនិងអ៊ីរ៉ាក់មក ហើយសម្ព័ន្ធមិត្តវាយប្រហារកាលពីខែមិថុនាឆ្នាំ២០១៤នោះគឺពួកក្រុមរដ្ឋឥស្លាមបានបាត់បង់ដែនដីគ្រប់គ្រងជាងពី៣០ទៅ៤០ភាគរយ។
លោកបន្ថែមថា ពេលនេះត្រូវការគិតពិចារណាឲ្យបានច្រើន ប៉ុន្តែលោកថាពេលនេះក៏ជាពេលដែលសម្ព័ន្ធមិត្តត្រូវធ្វើការរួមគ្នាដើម្បីលុបបំបាត់ក្រុមរដ្ឋឥស្លាម។ សាររបៀបនេះជាលើកដំបូងហើយដែលលើកឡើងដោយរដ្ឋមន្ត្រីការពារជាតិបារាំង៕
