នាយករដ្ឋមន្រ្តីថា​កុំ​ឲ្យ​ឆ្លៀតកេង​ចំណេញនយោបាយ​លើ​ភាពរាំងស្ងួត​

លោក​នាយករដ្ឋមន្រ្តី ហ៊ុន សែន ចែកទឹកសុទ្ធ​ដល់ប្រជា​ពលរដ្ឋ​កាលពីថ្ងៃ​អង្គារ​ម្សិលមិញ(រូបថតពីហ្វេសប៊ុក​របស់​នាយករដ្ឋមន្រ្តី)

លោកនាយករដ្ឋមន្រ្តី ហ៊ុន សែន នៅថ្ងៃព្រហស្បតិ៍នេះ បានថ្លែងកុំឲ្យក្រុមណាមួយឆ្លៀតឱកាសកេងចំណេញនយោបាយ ដោយសារភាពរាំងស្ងួតនៅកម្ពុជា ដោយចាត់ទុកថាអ្នកឆ្លៀតឱកាសទាំងនោះជាក្រុម”និយមឃោសនាបោកប្រាស់”។

ក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យធនធានមនុស្ស លោក ហ៊ុន សែន បានថ្លែងថាភាពរាំងស្ងួតដែលកំពុងកើតឡើងនៅកម្ពុជានេះជាបាតុភូតធម្មជាតិហើយប្រទេសដទៃក៏កំពុងជួបប្រទះផងដែរ។ លោកថានេះជាបញ្ហាក្នុងតំបន់ទាំងមូលមិនមែនកើតឡើងតែនៅកម្ពុជានោះទេ។

លោក ហ៊ុន សែន បានបញ្ជាក់ថា៖ “សូមកុំឆ្លៀតកេងចំណេញនយោបាយលើបញ្ហាភាពរាំងស្ងួតនៅប្រទេសកម្ពុជា”។ លោកស្នើកុំឲ្យមានការលើកឡើងថា៖ “អាទឹកជំនន់ វាថាមកកាប់ឈើ អារាំងស្ងួត វាថាមកពីកាប់ឈើ”។ លោកក៏បានអំពាវនាវឲ្យប្រជាពលរដ្ឋទាំងអស់ចូលរួមការពារព្រៃឈើជាមួយរដ្ឋាភិបាល ដោយលោកថារដ្ឋាភិបាលនិងប្រជាជនមានគោលដៅតែមួយគឺការពារព្រៃឈើ។

លោក ហ៊ុន សែន ក៏បានថ្លែងការពារចំណាត់ការរបស់រដ្ឋាភិបាលក្នុងការចែកទឹកជូនប្រជាពលរដ្ឋ ដើម្បីដោះស្រាយបញ្ហាខ្វះទឹក។ លោកបន្តថាមានអ្នកផ្តល់មតិឲ្យជីកស្រះទឹកនិងជីងអណ្តូងឲ្យបានច្រើនប្រសើរជាងដើរចែកទឹកបែបនេះ ប៉ុន្តែលោកបញ្ជាក់ថារដ្ឋាភិបាលបានធ្វើការងារនេះរួចហើយដោយថាចំនួនអណ្តូងទឹកនិងស្រះទឹកមានការកើនឡើង១០០ដង។

លោក ហ៊ុន សែន បន្ថែមថាលោកកំពុងមើលថាតើបក្សនយោបាយណាមួយចេញមុខដោះស្រាយបញ្ហាទឹកជូនប្រជាពលរដ្ឋ។ លោកបញ្ជាក់ថារហូតមកដល់ពដល់ពេលនេះ មិនទាន់មានបក្សនយោបាយណាមួយចេញមុខជួយប្រជាពលរដ្ឋនោះទេ។

ប្រធានគណបក្សអំណាចខ្មែរ លោក សួន សេរីរដ្ឋា មានប្រសាសន៍ថាការដឹកទឹកយកទៅចែកពលរដ្ឋដែលខ្វះទឹកជា”រូបភាពល្អមើល” តែលោកចាត់ទុកថា”វាមិនមែនជាការគ្រប់គ្រងល្អរបស់រដ្ឋាភិបាលទេ”។ លោកបញ្ជាក់ថា៖ “គណបក្សដទៃ ថ្មី ចាស់ ដែលមិនបានដឹកនាំរដ្ឋាភិបាលនិងមិនធ្លាប់កាប់បំផ្លាញព្រៃឈើ ព្រមទាំងមិនបានចាក់ដីលុបបឹងយកលក់ បើគេមិនបានចូលរួមដឹកទឹកដើរចែកពលរដ្ឋខ្មែរ ក៏មិនមែនជាកំហុសដែរ ពីព្រោះគណបក្សនយោបាយដទៃ ថ្មី និងចាស់ ទាំងអស់នោះមិនមែនចាយលុយជាតិ ដូច គណបក្សកាន់អំណាចទេ”។ លោកបន្ថែមថា៖ “តែបើរដ្ឋាភិបាលបណ្តោយឲ្យមានអ្នកស្លាប់ដោយសារដាច់ទឹកនោះ វាជាកំហុសដ៏ធ្ងន់ធ្ងរ ដែលបង្ហាញពីអមសត្ថភាពនៃការដឹកនាំ ដែលត្រូវតែចុះចេញពីតំណែង”៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered