បុរសសញ្ញាតិអាមេរិកម្នាក់ដែលមានកំណើតនៅលើទឹកដីកូរ៉េខាងត្បូងត្រូវកូរ៉េខាងជើងចាប់ឃាត់ខ្លួននិង សម្រេចដាក់ពន្ធនាគាររយៈពេល១០ឆ្នាំពីករណីចារកម្មស៊ើបការឲ្យអាមេរិក។
បុរសរូបនោះឈ្មោះ គីម ដួងចុល អាយុ៦២ឆ្នាំ ត្រូវបានអាជ្ញាធរកូរ៉េខាងជើងចាប់ខ្លួនតាំងពីខែតុលាឆ្នាំ២០១៥។ លោក គីម បានចេញមុខសារភាពកាលពីខែមុខនៅចំពោះមុខអ្នកសារព័ត៌មាន ដោយនិយាយថាការស៊ើបការនោះជាការរៀបចំរបស់ក្រុមមន្ត្រីកូរ៉េខាងត្បូង។ នេះបើតាមសារព័ត៌មាន BBC។
សហរដ្ឋអាមេរិកបានចោទប្រកាន់ថា កូរ៉េខាងជើងបានចាប់ប្រជាពលរដ្ឋធ្វើជានុយដើម្បីប្រើក្នុងហេតុការល្បែងការទូត ប៉ុន្តែការចោទប្រកាន់នេះត្រូវទីក្រុងព្យុងយ៉ាងបដិសេធ។
កាលពីខែមីនាកន្លងទៅនិស្សិតអាមេរិកម្នាក់ឈ្មោះ Otto Frederick Warmbier ត្រូវកូរ៉េខាងជើងសម្រេចឲ្យជាប់ពន្ធនាគារ១៥ឆ្នាំពីបទលួចធ្វើសកម្មភាពឃោសនាធ្វើសញ្ញាឲ្យពលរដ្ឋប្រឆាំងអំណាចរដ្ឋ៕
