ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃអាទិត្យនេះ បានបើសិក្ខាសាលាមួយ ផ្សព្វផ្សាយពីសារសំខាន់គោលនយោបាយនៃការអនុវត្តរបបសន្តិសុខសង្គម សម្រាប់សម្រួលដល់ការចំណាយរបស់កម្មករ និយោជិត ពេលពួកគេជួបបញ្ហាគ្រោះថ្នាក់ការងារ ។
ប្រធានសហភាពការងារកម្ពុជាលោក អាត់ ធន់ ដែលបានចូលរួមក្នុងកម្មវិធីនោះឲ្យដឹងថា មានតំណាងកម្មករ និយោជិត ប្រមាណជា២០០នាក់បានចូលរួមក្នុងសិក្ខាសាលានោះ។
លោក អាត់ ធន់ ឲ្យដឹងទៀតថា ការយល់ដឹងពីគោលនយោបាយនៃការអនុវត្តរបបសន្តិសុខសង្គម ជារឿងសំខាន់ ដោយលោកអះអាងថា នៅពេលដែល កម្មករ និយោជិត បានចូលជាសមាជិក ប ស ស ពេលពួកគេជួបគ្រោះថ្នាក់ការងារ ដូចជាដួលសន្លប់ ឬគ្រោះថ្នាក់ពេលធ្វើដំណើរចេញពីធ្វើការជាដើមនោះ លោកថារាល់ការព្យាលបាល ប ស ស ជាធានារ៉ាប់រងចេញថ្លៃព្យាបាល។
លោកអាត់ ធន់ ពន្យល់ថា បើកម្មករធ្វើការបានប្រាក់ឈ្នួល២០ម៉ឺនរៀល ត្រូវបង់ប្រាក់ចូលទៅ ប ស ស ប្រមាណជាង៣ពាន់រៀលក្នុងមួយខែ។ លោកថាបើកម្មករ ទទួលបានប្រាក់ឈ្នួល១លានរៀល ត្រូវបង់ទៅ ប.ស.ស ប្រមាណ១ម៉ឺន២ពាន់រៀល។
បើតាមលោក អាត់ ធន់ មកដល់ពេលនេះ មានកម្មករ និយោជិត ប្រមាណជាង១០ម៉ឺននាក់បានចុះបញ្ជីរួចហើយនៅ ប ស ស ក្នុងចំណោមកម្មកសរុបទូទាំងប្រទេស មានប្រមាណជា៧០ម៉ឺននាក់។
