គណៈកម្មាធិការជាតិរៀបចំការបោះឆ្នោត គ.ជ.ប មិនទាន់ប្រាកដថា ខ្លួននឹងជួយសមាជិកមួយរូប ដែលតុលាការសម្រេចឲ្យឃុំខ្លួននោះ ដោយរបៀបណានោះនៅឡើយទេ ដោយអះអាងថា រងចាំក្រុមការងារពិសេសរបស់ខ្លួន ប្រមូលឯកសាពីស្ថាប័នពាក់ព័ន្ធ ទាក់ទិននឹងវិធានការឃុំខ្លួននោះជាមុនសិន។
អគ្គលេខាធិការរង គ.ជ.ប លោក នី ចរិយា ត្រូវបានតុលាការសម្រេចឲ្យឃុំខ្លួននៅពន្ធនាគារព្រៃស បណ្តោះអាសន្ន កាលពីថ្ងៃទី២ ខែឧសភា ឆ្នាំ២០១៦ ចោទប្រកាន់ពីបទ សមគំនិត សូកប៉ាន់សាក្សីពាក់ព័ន្ធសំណុំរឿងកញ្ញា ខុម ចាន់តារ៉ាទី ហៅស្រីមុំ ដែលគេចោទថាស្រី មុំ មានទំនាក់ទំនងស្នេហាជាមួយមេដឹកនាំបក្សប្រឆាំងមួយរូប។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ប្រាប់វីអូឌី(VOD)នៅថ្ងៃអាទិត្យថា គ.ជ.ប បានបង្កើតក្រុមអ្នកច្បាប់តាមដានស្វែងរកការពិតទៅលើវិធានការឃុំខ្លួនលោក នី ចរិយា។
ប៉ុន្តែលោកថា មកដល់ពេលនេះ គ.ជ.ប នូវមិនដឹងថាអាចជួយអ្វីបានដល់លោក នី ចរិយា ដើម្បីឲ្យមន្ត្រីរូបនោះបាននៅក្រៅឃុំបណ្តោះអាសន្ននៅឡើយទេ ដោយលោកអះអាងថា រងចាំក្រុមការងារប្រមូលព័ត៌មានពីស្ថាប័នពាក់ព័ន្ធជាមុនសិន ទើប គ.ជ.ប បើកកិច្ចប្រជុំជាមួយសមាជិករបស់ខ្លួនទាំង៩រូប ដើម្បីសម្រេចថា នឹងជួយលោកនី ចរិយា ឬយ៉ាងណាផ្អែកតាមគោលការណ៍ច្បាប់នោះ។
ទោះជាយ៉ាងណា លោក ហង្ស ពុទ្ធា បានបង្ហាញពីការសោកស្តាយចំពោះការបាត់បង់សមាជិករបស់ខ្លួនមួយរូប លោក នី ចរិយានេះ ដោយលោកថា ការបាត់បង់នេះជាបន្ទុកមួយលើ គ.ជ.ប ដោយលោកថា ខណៈការបោះឆ្នោតជ្រើសរើសក្រុមប្រឹក្សាឃុំសង្កាត់២០១៧ខាងមុខ ជិតមកដល់។
