យុវជន​ជាង​៥០០​នាក់​ជិះ​កង់​រក​ប្រាក់​សម្រាប់​ឧបត្ថម្ភ​មន្ទីរពេទ្យ​គន្ធបុប្តា​ខេត្ដសៀមរាប​

ក្រុមយុវជនមួយក្រុមមានគ្នាប្រមាណ៥៥០នាក់ នៅព្រឹកថ្ងៃអាទិត្យនេះ បាននាំគ្នាជិះកង់រៃអង្គាស់ប្រាក់ សម្រាប់ជួយឧបត្ថម្ភដល់មន្ទីរពេទ្យកុមារជ័យវរ្ម័នទី៧ ឬមន្ទីរពេទ្យគន្ធបុប្ផា ខេត្ដសៀមរាប។

ក្រុមអ្នកជិះកង់ទាំងនោះ មានឯកសណ្ឋាន អាវចម្រុះពណ៌ ដោយចាប់ផ្ដើមពីខាងមុខផ្សារសាមគ្គី ក្នុងសង្កាត់ស្លក្រាម ក្រុងសៀមរាប ដោយឆ្លងកាត់តាមផ្លូវសំខាន់ៗមួយចំនួន ក្នុងតំបន់ទេសចរ និងបានបញ្ចប់នៅខាងមុខប្រាសាទបាលិល័យ ក្នុងក្រុងនគរធំ។

ប្រធានក្រុមអ្នកជិះកង់នៃក្លឹបអ្នកជិះកង់ ដើម្បីសហគមន៍ នៅខេត្ដសៀមរាប លោក គឹម ប៊ុនថាន ឲ្យវីអូឌី(VOD)ដឹងថា ការធ្វើយុទ្ធនាការជិះកង់ រកប្រាក់ពីសប្បុរសជន ដើម្បីជួយឧបត្ថម្ភដល់មន្ទីរពេទ្យកុមារគន្ធបុប្ផានេះ ដោយសារតែលោកដឹងថា មន្ទីរពេទ្យនេះកំពុងប្រឈមនឹងអត់ថវិកា។

លោក គឹម ប៊ុនថាន ឲ្យដឹងទៀតថា មន្ទីរពេទ្យគន្ធបុប្ផានៅខេត្តសៀមរាបនេះ បានជួយព្យាបាលជំងឺកុមារកម្ពុជារាប់លាននាក់ក្នុងមួយឆ្នាំៗ ដោយមិនគិតថ្លៃ ខណៈដែលអ្នកគ្រប់គ្រងមន្ទីរពេទ្យនោះជាជនបរទេស។

លោកគឹម ប៊ុនថា បន្ថែមថា ថវិកាដែលទទួលបានពីការជិះកង់នេះបានជាង១៥០០០ដុល្លារ ហើយនឹងផ្ដល់ជូនដល់មន្ទីរពេទ្យនៅពាក់កណ្ដាលខែឧសភានេះ។

គួរបញ្ជាក់ថា នេះជាព្រឹត្តិការណ៏ឆ្នាំទី ៣ ហើយដែល លើកទី ០១ មានអ្នកចូលរួមជាង ៣00នាក់ ប្រមូលថវិកាបាន២៥៤៣ដុល្លារ លើកទី ០២ អ្នកចូលរួមជាង ៣០០នាក់ ប្រមូលលុយបាន ៧០៩៧ដុល្លារ និងលើកទី០៣នេះ ប្រមូលថវិកាបានជាង១៥០០០ដុល្លា៕