អ្នកឆ្លើយឆ្លងឲ្យសារព័ត៌មាន BBC ម្នាក់ត្រូវបានសមត្ថកិច្ចកូរ៉េខាងជើងឃាត់ខ្លួននិងបញ្ជាឲ្យលុបចោលនូវអត្ថបទរាយការណ៍ ខណៈអ្នកព័ត៌មានរូបនោះរួមជាមួយអ្នកសារព័ត៌មានបរទេសផ្សេងៗទៀតទៅយកព័ត៌មាននៅពេលសមាជដ៏កម្ររបស់គណបក្សកាន់អំណាចនៅកូរ៉េខាងជើង។
កូរ៉េខាងជើងបានផ្តល់ទិដ្ឋាការឲ្យអ្នកសារព័ត៌មានបរទេសចំនួន១២៨នាក់មកពីប្រទេសចំនួន១២ចូលទៅយកព័ត៌មានក្នុងដំណើរការធ្វើសមាជដ៏កម្ររបស់គណបក្សកាន់អំណាច។ ការធ្វើសមាជនេះជាលើកទី១ហើយរបស់គណបក្សកាន់អំណាចនៅកូរ៉េខាងជើងក្នុងរយៈពេល៤០ឆ្នាំមកនេះដែលចាប់ផ្តើមកាលពីថ្ងៃសុក្រសប្តាហ៍មុន។
អ្នកឆ្លើយឆ្លងព័ត៌មាន BBC ដែលត្រូវបានឃុំខ្លួននោះឈ្មោះ Rupert Wingfield-Hayes។ អ្នកឆ្លើយឆ្លងព័ត៌មាន BBC ម្នាក់ទៀតទៅទីក្រុងព្យុងយ៉ាងដែរគឺលោក John Sudworth ថ្លែងថានៅក្នុងព័ត៌មានដែលផ្សព្វផ្សាយរបស់មិត្តរួមការងាររបស់លោកនោះគឺមានការខ្វែងគំនិតគ្នាជាមួយអាជ្ញាធរលើចំណុចខ្លះនិងបញ្ហាមួយទៀតគឺការទៅសាកសួរធ្វើព័ត៌មានពីដំណើរនៅក្នុងមន្ទីរពេទ្យមួយនៅព្យុងយ៉ាង៕
