អូស្ត្រាលី​គាំទ្រ​សមយុទ្ធ​យោធា​អាមេរិក​នៅ​តំបន់​ជម្លោះ​ក្នុង​សមុទ្រ​ចិន​ខាង​ត្បូង

ប្រទេសអូស្ត្រាលី នៅថ្ងៃព្រហស្បតិ៍នេះ បានគាំទ្រសហរដ្ឋអាមេរិក ដែលបានធ្វើប្រតិបត្តិការនាវាចរណ៍ទៅជិតដែនកោះប៉ប្រះទឹកកំពុងមានជម្លោះនៅសមុទ្រចិនខាងត្បូង ខណៈប្រទេសចិនចាត់ទុកទង្វើអាមេរិកជាការប្រព្រឹត្តខុសច្បាប់។

ទីភ្នាក់ងារព័ត៌មាន Reuters បានរាយការណ៍ថា នាវាបំពាក់ដោយគ្រាប់មីស៊ីលរបស់អាមេរិកឈ្មោះ USS William P. Lawrence កាលពីថ្ងៃអង្គារម្សិលមិញ បានធ្វើដំណើរលើដែនទឹកស្ថិតនៅចម្ងាយ ១២គីឡូម៉ែត្រពីដែនដីកោះប៉ប្រះទឹកកាន់កាប់ដោយប្រទេសចិន។ ប្រតិបត្តិការរបស់នាវាអាមេរិកមួយគ្រឿងនោះ គឺជាផ្នែកមួយនៃសមយុទ្ធយោធានៅតំបន់ដែនដីកោះប៉ប្រះទឹក Fiery Cross ដែលប្រទេសចិន កោះតៃវ៉ាន់ និងប្រទេសវៀតណាម កំពុងប្រទាញប្រទង់គ្នា។

អូស្ត្រាលី បានគាំទ្រសេរីភាពនាវាចរណ៍ដែលដឹកនាំដោយអាមេរិក នៅសមុទ្រចិនខាងត្បូង ជាទីដែលក្រុងប៉េកាំង និងបណ្ដាប្រទេសដទៃទៀតក្នុងតំបន់ អះអាងជាម្ចាស់កម្មសិទ្ធិ។

រដ្ឋមន្ត្រីការបរទេសអូស្ត្រាលី លោកស្រី Julie Bishop បានប្រាប់វិទ្យុអូស្ត្រាលី ABC នៅថ្ងៃព្រហស្បតិ៍នេះថា រដ្ឋទាំងអស់មានសិទ្ធិសេរីភាពក្នុងការធ្វើនាវាចរណ៍ និងហោះហើរ នៅសមុទ្រចិនខាងត្បូង ដោយយោងទៅតាមច្បាប់អន្តរជាតិ។

លោកស្រីបន្ថែមថា សហរដ្ឋអាមេរិកកំពុងអនុវត្តសិទ្ធិរបស់គេដូចទៅនឹងអ្វីដែលអាមេរិកធ្លាប់បានធ្វើកន្លងមក។

ចិន និងសហរដ្ឋអាមេរិក បានចោទប្រកាន់គ្នាទៅវិញទៅមកចំពោះការបង្កើនវត្តមានយោធានៅសមុទ្រចិនខាងត្បូង ខណៈប្រទេសចិនកំពុងអះអាងជាម្ចាស់ទៅលើដែនទឹកដ៏ធំល្វឹងល្វើយ ហើយបានបង្កើតមូលដ្ឋានយោធានៅលើដែនកោះទាំងនោះ។ ចំណែកឯសហរដ្ឋអាមេរិក បានបង្កើនប្រតិបត្តិការល្បាត និងសមយុទ្ធរបស់ខ្លួននៅសមុទ្រចិនខាងត្បូងផងដែរ។

ចិនបានសាងសង់ព្រលានយន្តហោះមួយប្រវែង ៣គីឡូម៉ែត្រនៅលើកោះ Fiery Cross ដែលធ្វើឲ្យអាមេរិកព្រួយបារម្ភថា ចិននឹងប្រើប្រាស់ដែនកោះមួយនេះ ដើម្បីពង្រីកដែនទឹករបស់ខ្លួននៅក្នុងសមុទ្រចិនខាងត្បូង៕ ប្រភព៖ Channel News Asia

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered