មន្រ្តីក្រសួងវប្បធម៌និងវិចិត្រសិល្បៈនៅថ្ងៃអង្គារនេះបានជួបជាមួយតារាសម្ដែង ដេនី ក្វាន់ អំពីការស្លៀកពាក់ស៊ិចស៊ីរបស់នាង ដោយមន្រ្តីណែនាំកុំឲ្យស្លៀកពាក់ស៊ិចស៊ីហួសហេតុពេកនាំឲ្យ”ប៉ះពាល់ដល់វប្បធម៌និងអរិយធម៌ជាតិ”។
រដ្ឋលេខាធិការក្រសួងវប្បធម៌និងវិចិត្រសិល្បៈ លោក ថៃ នរៈសត្យា បានហៅនាង ដេនី ក្វាន់ ឲ្យចូលរួមប្រជុំ ដើម្បីណែនាំនិងចង្អុលបង្ហាញអំពីការស្លៀកពាក់ស៊ិចស៊ី។ លោកមានប្រសាសន៍ថាក្រសួងមិនមានគោលការណ៍ហាមឃាត់ថាមិនឲ្យស្លៀកពាក់ស៊ិចស៊ីនោះទេ ព្រោះជាសេរីភាពរបស់បុគ្គល តែលោកថាគួរតែស្លៀកពាក់ក្នុងកម្រិតណាមួយកុំឲ្យជ្រុលពេក។
លោកមានប្រសាសន៍ថា៖ “(វាជា)សិទ្ធសេរីភាពរបស់បុគ្គលនៅក្នុងការស្លៀកពាក់នៅក្នុងការតុបតែងខ្លួន។ យើងបានពន្យល់គាត់អំពីបញ្ហានេះតាមការពិតពុំមានច្បាប់ឯណាមួយនិងមានបទបញ្ញត្ដិមិនឲ្យស្លៀកពាក់ស៊ិចស៊ីនោះទេ ប៉ុន្ដែបើសម្ដីណែនាំថាក្មួយគួរស៊ិចស៊ីក្នុងកម្រិតណា ក្មួយគួរធ្វើអីកុំឲ្យវាពេក កុំឲ្យវាហួសពេក”។
លោក ថៃ នរៈសត្យា បានឲ្យដឹងថានាងដេនី ក្វាន់ ក៏បានយល់ព្រមនិងទទួលយកការអប់រំណែនាំរបស់ក្រសួង។
គួរបញ្ជាក់ថាការចេញលិខិតហៅរបស់ក្រសួងវប្បធម៌និងវិចិត្រសិល្បៈមកលើដេនី ក្វាន់ ក្រោយពីមានការមានការរិះគន់ពីសំណាក់អ្នកសិល្បៈក៏ដូចជាការមហាជនអំពីការស្លៀកពាក់របស់នាងនៅក្នុងការពិធីខួបកំណើតប្អូនប្រុសកាលពីថ្ងៃទី៥ ខែឧសភា កន្លងទៅនេះ។ បន្ទាប់ពីការរិះគន់ នាងបានចេញមុខសុំទោសជាសាធារណៈចំពោះការស្លៀកពាក់នេះ៕