ប្រធានគណៈកម្មាធិការនាយកនៃគណបក្សសង្គ្រោះជាតិ អំពាវនាវឲ្យសាធារណៈជនទាំងអស់រស់នៅក្រោមច្បាប់ ហើយមិនឲ្យក្រុមណាមួយប្រើអំណាចអនុវត្តច្បាប់ឲ្យខុសខ្លឹមសារដើម នាំឲ្យកើតមានបញ្ហានៅក្នុងសង្គមនោះទេ។
ថ្លែងទៅកាន់អ្នកគាំទ្រនៅមុខស្នាក់ការកណ្តាលរបស់គណបក្សសង្គ្រោះជាតិ នៅព្រឹកថ្ងៃសៅរ៍នេះ លោក ប៉ុល ហំម លើកឡើងថា គណបក្សរបស់លោក មានក្រុមការងារកំពុង សិក្សាច្បាប់ឲ្យបានល្អិតល្អន់ កុំឲ្យគណបក្សកាន់អំណាចអនុវត្តច្បាប់ ទៅតាមតែចិត្តចង់បាន៖
កុំឲ្យគេយកច្បាប់ទៅទាញឲ្យយឺតដូចកៅស៊ូ ដើម្បីឲ្យត្រូវតាមចំណង់ចំណូលចិត្ត របស់គណបក្សកាន់អំណាច។
លោក ប៉ុល ហំម បញ្ជាក់ថា គណបក្សរបស់លោក ចង់ឲ្យមានស្ថានភាពនយោបាយ ល្អប្រសើរឆ្ពោះទៅរកការបោះឆ្នោតដោយសេរី និង យុត្តិធម៌។
បច្ចុប្បន្នអ្នកច្បាប់គណបក្សសង្គ្រោះជាតិ កំពុងបកស្រាយផ្ទុយគ្នាជាមួយអ្នកច្បាប់របស់គណបក្សប្រជាជនកម្ពុជានិងតុលាការ ជុំវិញករណីលោក កឹម សុខា។ អ្នកច្បាប់ គណបក្សប្រជាជនកម្ពុជា និង តុលាការ បកស្រាយថា ករណីលោកកឹម សុខា មិនចូលខ្លួនទៅតុលាការតាមដីកាកោះគឺជាបទល្មើសជាក់ស្តែង ត្រូវចាប់ខ្លួន ចំណែកអ្នកច្បាប់ គណបក្សសង្គ្រោះជាតិ បកស្រាយថា ករណីលោកកឹម សុខា មិនចូលខ្លួនទៅតុលាការនោះ មិនមែនជាបទល្មើសជាក់ស្តែងនោះទេ ហើយថា លោក កឹម សុខា មានអភ័យសិទ្ធិមិនអាចចាប់ខ្លួនបានទេ។