បុរសជនជាតិថៃម្នាក់ដែលត្រូវពស់ថ្លាន់ខាំពងស្វាសខណៈកំពុងបន្ទោរបង់នោះ កំពុងជាសះស្បើយវិញហើយ។
ទីភ្នាក់ងារព័ត៌មាន AFP ដែលបានដកស្រង់សម្ដីបុគ្គលិកមន្ទីរពេទ្យ បានរាយការណ៍ថា លោក អាត់ថាផន ប៊ុនម៉ាកឈួយ ត្រូវបានគេជួយសង្គ្រោះ បន្ទាប់ពីរងគ្រោះដោយសារពស់ខាំពងស្វាសនៅក្នុងបន្ទប់ទឹកក្នុងគេហដ្ឋានរបស់គាត់នៅខេត្តចះជើងសៅ ភាគខាងកើតទីក្រុងបាងកក។
អ្នកស្រី រ៉ុងណាផា សីហវង្ស អ្នកគ្រប់គ្រងមន្ទីរពេទ្យជូឡារ៉ាត់ ១១ បាននិយាយថា បុរសរូបនោះ អាចនោមដូចធម្មតា ហើយភាពឈឺចាប់បានថមថយហើយ។
អ្នកស្រីបន្ថែមថា បុរសវ័យ ៣៨ឆ្នាំរូបនោះ ទទួលបានថ្នាំផ្សះ និងអាចចេញពីមន្ទីរពេទ្យតែពីរបីថ្ងៃទៀតប៉ុណ្ណោះ។
នៅក្នុងកិច្ចសម្ភាសជាមួយទូរទស្សន៍ក្នុងស្រុកពីមន្ទីរពេទ្យនោះ លោក អាត់ថាផន បាននិយាយថា បង្គន់ហាក់ពុំមានអ្វីទេមុនពេលអង្គុយបត់ជើង។
លោកបន្តថា រំពេចនោះពស់ថ្លាន់បានផុសចេញពីចានបង្គន់ ហើយខាំគាត់។ លោកបានចាប់កពស់នោះ ដើម្បីកុំឲ្យទាញលោកផ្ដួល។
ទោះជាយ៉ាងណា លោក អាត់ថាផន ត្រូវបានគេជួយសង្គ្រោះទាន់ បន្ទាប់ពីស្រែករកការជួយពីភរិយា និងអ្នករស់នៅជិតខាងរបស់លោក៕
