ប្រធានាធិបតីចិន លោក ស៊ី ជិនពីង បានប្រាប់ទៅមន្ត្រីជាន់ខ្ពស់របស់ប្រទេសលោកនៅឯកិច្ចប្រជុំអំពីប្រជាជនវ័យចំណាស់ថា ចិនគួរតែបង្កើនការវិនិយោគលើការថែទាំមនុស្សចាស់។
ទីភ្នាក់ងារព័ត៌មាន Reuters ដែលបានដកស្រង់សម្ដីលោក ស៊ី បានរាយការណ៍ថា វិធានការគោលនយោបាយ មូលដ្ឋានការងារ យន្តការស្ថាប័នជាដើម សុទ្ធតែមិនទាន់គ្រប់គ្រាន់ក្នុងការបង្រួមគម្លាត ដែលរំពឹងទុកថា មនុស្សចាស់នឹងទទួលបានសុភមង្គលនៅក្នុងឆាកជីវិតចុងក្រោយនោះឡើយ។
ក្នុងរយៈពេលប៉ុន្មានទសវត្សរ៍ចុងក្រោយនេះ ចំនួនប្រជាជនស្ថិតក្នុងវ័យពេញបម្រើការងារបាននៅក្នុងប្រទេសចិន បានធ្លាក់ចុះជាលើកដំបូងនៅឆ្នាំ២០១២ ហើយប្រទេសដែលមានចំនួនប្រជាជនច្រើនជាងគេនេះ អាចក្លាយជាប្រទេសដំបូងគេលើកពិភពលោកដែលមានប្រជាជនវ័យចំណាស់ច្រើន មុនប្រទេសក្លាយជាអ្នកមាន។
ចំនួនប្រជាជននឹងកើនដល់ ១.៤៥ពាន់លាននាក់នៅឆ្នាំ២០៥០ ជាពេលដែលមនុស្សម្នាក់ក្នុងចំណោម ៣នាក់ ត្រូវបានគេរំពឹងថានឹងមានអាយុលើសពី ៦០ឆ្នាំ ដែលធ្វើឲ្យចំនួនមនុស្សពេញកម្លាំងធ្វើការ នឹងធ្លាក់ចុះ។
លោក ស៊ី បានប្រាប់មន្ត្រីមជ្ឈឹមបក្សកុំម្មុយនីស្ដថា នៅពេលដែលចំនួនមនុស្សចាស់កាន់តែច្រើន បញ្ហាប្រឈមគឺការទទួលខុសត្រូវដ៏សំខាន់។
ចំនួនពលរដ្ឋវ័យចំណាស់នៅចិន គឺជាកត្តាមួយដែលអ្នកវិភាគជាច្រើនរំពឹងថានឹងប៉ះពាល់ដល់ទស្សនៈវិស័យកំណើនសេដ្ឋកិច្ចរយៈពេលយូរ៕