ក្រុមរបស់យុវជនស្រី ចំរើន ដែលមានគ្នាជាង២០០នាក់ នៅម៉ោងប្រមាណ៣និង៣០នាទីនេះ បានរារាំងរថយន្តរបស់តំណាងរាស្រ្តនិងអ្នកគាំទ្រមួយមិនឲ្យចូលដាក់ញត្តិនៅព្រះបរមរាជវាំង។
សមត្ថកិច្ចបានអនុញ្ញាតឲ្យរថយន្តរបស់តំណាងរាស្រ្តគណបក្សសង្រ្គោះជាតិចំនួន២៣គ្រឿងដង្ហែជាក្បួននៅរសៀលថ្ងៃចន្ទនេះ ដើម្បីដាក់ញត្តិថ្វាយព្រះមហាក្សត្រសុំអន្តរាគមន៍ ករណីចាប់ខ្លួនអ្នកតំណាងរាស្រ្តនិងចំណាត់ការរបស់តុលាការលើប្រធានស្តីទី លោក កឹម សុខា។
នៅពេលក្បួនរថយន្តមកដល់សណ្ឋាគារកាំបូឌីយ៉ាណា ក្រុមយុវជនស្រី ចំរើន បានចេញមុខហាមឃាត់មិនឲ្យទៅដាក់ញត្តិ រហូតដល់មានការប្រទាញប្រទង់គ្នាទៅវិញទៅមក។ រថយន្តរបស់តំណាងរាស្រ្តមួយចំនួនអាចសម្រុកចូលទៅដាក់ញត្តិបាន ក្រោយពីមានការសម្រួលពីអាជ្ញាធរ។ ក្រុមយុវជនស្រីចំរើន បានយករថយន្តមកដាក់លើផ្លូវដើម្បីរារាំងការដង្ហែក្បួន។ សមត្ថកិច្ចនិងសកម្មជនបក្សប្រឆាំងកំពុងតែព្យាយាមរុញរថយន្តចេញ ដើម្បីបន្តការធ្វើដំណើរ។
មុនការដង្ហែក្បួន សាលាក្រុងភ្នំពេញបានចេញលិខិតមួយដោយមិនអនុញ្ញាតឲ្យគណបក្សសង្រ្គោះជាតិដឹកនាំអ្នកគំាទ្រធ្វើបាតុកម្ម ដោយផ្អែកលើមូលហេតុថាការដាក់ពាក្យជូនដំណឹងស្តីការដង្ហែញតិ្ត ពុំស្របតាមនីតិវិធីច្បាប់ស្តីពីការធ្វើបាតុកម្មដោយតម្រូវឲ្យដាក់ពាក្យសុំយ៉ាងតិច៥ថ្ងៃ(គណបក្សប្រឆាំងដាក់ពាក្យសុំនៅព្រឹកថ្ងៃចន្ទនេះ)។ សាលាក្រុងបន្តថា៖ “ការដង្ហែក្បួនធ្វើឲ្យប៉ះពាល់ដល់សន្តិសុខ សុវត្ថិភាព សណ្តាប់ធ្នាប់ របៀបរៀបរយសាធារណៈនិងការកកស្ទះចរាចរណ៍ ពិសេសប្រក្រតីភាពសម្រាប់ការរស់នៅរបស់ប្រជាពលរដ្ឋ ក្នុងរាជធានីភ្នំពេញ។ ដើម្បីបញ្ចៀសបានបាននូវការការប៉ះទង្គិចគ្នារវាងអ្នកគាំទ្រឲ្យមានការអនុវត្តច្បាប់និងក្រុមអ្នកដង្ហែញតិ្តរបស់គណបក្សសង្រ្គោះជាតិ រដ្ឋបាលរាជធានីភ្នំពេញសម្រេចមិនអនុញ្ញាតឲ្យក្រុមណាមួយធ្វើការជួបជុំនិងដង្ហែក្បួននោះទេ”។ សាលាក្រុងបានបញ្ជាក់បន្ថែមថាក្នុងករណីនៅតែមានការជួបជុំដង្ហែញ្ញតិតាមផ្លូវសាធារណៈឬផ្ទុយពីស្មារតីអង្គប្រជុំរបស់សាលារាជធានីភ្នំពេញ ប្រធានគណៈកម្មាធិការប្រតិបត្តិរាជធានីភ្នំពេញត្រូវទទួលខុសត្រូវមុខច្បាប់៕
