ឥណ្ឌូណេស៊ី​ចាប់​ទូក​នេសាទ​ខុស​ច្បាប់​ហ្វីលីពីន និង​វៀតណាម

ប្រទេសឥណ្ឌូណេស៊ី កាលពីថ្ងៃអង្គារម្សិលមិញ បានឃាត់ទូកនេសាទហ្វីលីពីន និងវៀតណាម ដោយសារសង្ស័យថាបានចូលនេសាទដោយខុសច្បាប់នៅក្នុងដែនទឹកស្ថិតក្នុងខេត្តប៉ាពួខាងលិច។

សារព័ត៌មាន Channel News Asia បានរាយការណ៍ថា មានការបាញ់កាំភ្លើងព្រមានចំនួន ៣លើក មុននឹងទូកទាំងនោះ ត្រូវបានគេស្ទាក់ចាប់បាន។ នាវិក ១០នាក់ ក្នុងនោះមានជនជាតិឥណ្ឌូណេស៊ីម្នាក់នៅលើទូកនេសាទហ្វីលីពីន និងមនុស្ស ១៣នាក់ទៀតនៅលើទូកនេសាទវៀតណាម ត្រូវបានអាជ្ញាធរឥណ្ឌូណេស៊ីចាប់ឃុំខ្លួន។

ទីភ្នាក់ងារព័ត៌មានរដ្ឋឥណ្ឌូណេស៊ី បាននិយាយថា គេមិនឃើញមានត្រីនៅលើទូកនេសាទទាំងនោះទេ ប៉ុន្តែ ទូកនេសាទវៀតណាមដឹកដង្កូវសមុទ្រទម្ងន់ ៨តោនមួយក្បាល ដែលគេជឿថានេសាទបាននៅបរិវេណនោះ។

ទូកនេសាទទាំងពីរ ពុំមានឯកសារច្បាប់ចាំបាច់សម្រាប់ចូលមកដែនទឹកឥណ្ឌូណេស៊ីនោះឡើយ ហើយអាជ្ញាធរនឹងស៊ើបអង្កេតលើសមាជិកនាវិកទូកនេសាទទាំងពីរ។

ឥណ្ឌូណេស៊ី កាលពីថ្ងៃសុក្រសប្ដាហ៍មុន បានចាប់ទូកនេសាទចិនមួយគ្រឿង ដោយសង្ស័យថាបានចូលនេសាទដោយខុសច្បាប់នៅដែនទឹកនៃឆ្នេរកោះណាទូណា។ អាជ្ញាធរបានឃុំខ្លួនសមាជិកនាវិក ៨នាក់របស់ទូកនេសាទនោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ