អន្តរជាតិ

មេដឹកនាំតៃវ៉ាន់ជំរុញចិនឲ្យព្យាបាលរបួសធៀនអានមេន

លោក ឌិត សុខធី
| ០៥ មិថុនា ២០១៦
ម៉ោង ០៨:២៦

ប្រធានាធិបតីថ្មីរបស់តៃវ៉ាន់ លោកស្រី សៃ អ៊ីងវ៉េន(រូបភាពពីសារព័ត៌មានChannel News Asia)

ប្រធានាធិបតីថ្មីរបស់តៃវ៉ាន់ លោកស្រី សៃ អ៊ីងវ៉េន បានជំរុញឲ្យចិនផ្ដល់សិទ្ធិកាន់តែច្រើនដល់ប្រជាជនខ្លួន និងព្យាបាលរបួស និងភាពឈឺចាប់នាអតីតកាល នៅចំថ្ងៃរំឭកខួបលើកទី ២៧ឆ្នាំ នៃហេតុការណ៍បង្ក្រាបនៅទីលានធៀនអានមេន កាលពីថ្ងៃសៅរ៍ម្សិលមិញ។

លោកស្រីបានថ្លែងដូច្នេះ បន្ទាប់ពីមានការរំឭកខួបទីលានធៀនអានមេន ជាលើកដំបូងនៅក្នុងសភារបស់ដែនដីកោះមួយនេះ កាលពីថ្ងៃសុក្រ កន្លងមក ខណៈក្រុមសមាជិកសភា បានជំរុញឲ្យរដ្ឋាភិបាលលើកយកបញ្ហាសិទ្ធិមនុស្ស មកជជែកនៅក្នុងទំនាក់ទំនងរបស់ខ្លួនជាមួយចិន។

ទំនាក់ទំនងជាមួយប្រទេសចិន បានកើតមានបញ្ហាយ៉ាងឆាប់រហ័សចាប់តាំងពីពេលលោកស្រី បានឈ្នះការបោះឆ្នោតប្រធានាធិបតីកាលពីខែមករាកន្លងមក ដោយក្រុងប៉េកាំងបានពុំទុកចិត្តលើគណបក្ស DPP ដែលមានទំនោរចង់បានឯករាជ្យនោះឡើយ។

បើទោះបីជាកោះតៃវ៉ាន់ មានរបបគ្រប់គ្រងខ្លួនឯងចាប់តាំងពីបំបែកខ្លួនពីចិនដីគោកកាលពីឆ្នាំ១៩៤៩ក៏ដោយ ក៏ចិននៅតែចាត់ទុកដែនដីកោះនេះ ជាទឹកដីរបស់ខ្លួនដដែល។

ដោយបានលើកឡើងពីហេតុការណ៍ទីលានធៀនអានមេនជាលើកដំបូងក្នុងឋានៈជាមេដឹកនាំតៃវ៉ាន់នោះ លោកស្រី សៃ បាននិយាយថា ចិនត្រូវតែបើកចំហចំពោះហេតុការណ៍បង្ក្រាបទៅលើការតវ៉ាបែបប្រជាធិបតេយ្យនៅឆ្នាំ១៩៨៩ នៅទីក្រុងប៉េកាំង ដែលគេជឿថាបានបណ្ដាលឲ្យមនុស្សជាង ១ពាន់នាក់ស្លាប់។

អាជ្ញាធរចិន បានចាត់ទុកបាតុកម្មនោះជាការបះបោរប្រឆាំងបដិវត្តន៍ ហើយមនុស្សជាច្រើននៅចិនដីគោក នៅតែមិនបានដឹងនូវអ្វីដែលបានកើតឡើងនោះឡើយ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។