ពលរដ្ឋខ្មែរនៅក្រៅប្រទេសតវ៉ាឲ្យដោះលែង​មន្ត្រី​សិទ្ធិមនុស្ស​និង​អ្នកនយោបាយជាប់ឃុំ

សកម្មភាពខ្មែរនៅក្រៅប្រទេសតវ៉ាឲ្យដោះលែង​មន្ត្រី​សិទ្ធិមនុស្ស​និង​អ្នកនយោបាយ(រូបភាពពី​បណ្តាញសង្គម)

ពលរដ្ឋខ្មែររស់នៅក្រៅប្រទេស បានជួបជុំគ្នាតវ៉ានៅតាមបណ្ដាប្រទេសនានា ដែលពួកគេរស់នៅ ដើម្បីជំរុញឲ្យរដ្ឋាភិបាលទាំងនោះ ដាក់សម្ពាធទៅលើរដ្ឋាភិបាលកម្ពុជា ឲ្យគោរពលទ្ធិប្រជាធិបតេយ្យ ដោះលែងអ្នកការពារសិទ្ធិមនុស្ស និងសកម្មជននយោបាយសរុប ១៩នាក់ ដែលកំពុងជាប់ឃុំ។

តំណាងរាស្ត្រគណបក្សសង្គ្រោះជាតិ ២រូប មន្ត្រីការពារសិទ្ធិអាដហុក ៤រូប មន្ត្រីគ.ជ.ប.មួយរូប និងសកម្មជនបក្សប្រឆាំងជាច្រើននាក់ទៀត ត្រូវបានតុលាការកម្ពុជាសម្រេចឲ្យដាក់ឃុំជាបន្តបន្ទាប់ ខណៈលោក កឹម សុខា ក៏កំពុងប្រឈមមុខនឹងការចាប់ខ្លួនពីសំណាក់សមត្ថកិច្ចផងដែរ។

វីដេអូឃ្លីបនានា ដែលត្រូវបានបង្ហោះនៅលើទំព័រហ្វេសប៊ុកសម្ព័ន្ធខ្មែរ-អាមេរិក បានបង្ហាញថា ការតវ៉ាទាំងនោះ ត្រូវបានគេរៀបចំធ្វើឡើងនៅសហរដ្ឋអាមេរិក ប្រទេសបារាំង និងកាណាដា។

នៅក្នុងកិច្ចសម្ភាសមួយជាមួយវិទ្យុសំឡេងសហរដ្ឋអាមេរិក លោក ទូច វិបុល ប្រធានអង្គការសម្ព័ន្ធខ្មែរ-អាមេរិក បានថ្លែងថា ក្រុមអ្នកតវ៉ានៅរដ្ឋធានីវ៉ាស៊ីងតោន បានស្នើទៅសភាអាមេរិកឲ្យបង្កើតច្បាប់សម្រាប់ដាក់ទណ្ឌកម្មផ្នែកសេដ្ឋកិច្ច និងកាទូត ទៅលើរដ្ឋាភិបាលកម្ពុជា ឲ្យដោះលែងមនុស្សទាំង ១៩រូបនោះ និងជំរុញឲ្យសភាអាមេរិក បង្កើតក្រុមការងារ ដើម្បីធានាដល់ការបោះឆ្នោតដោយសេរី និងយុត្តិធម៌នាពេលខាងមុខ។

មន្ត្រីការពារសិទ្ធិសមាគមអាហុក ៤នាក់ មាន លោក នី សុខា លោក ណៃ វ៉ង់ណា លោក យី សុខសាន្ត និងលោកស្រី លឹម មុនី និងអគ្គលេខាធិការរង គជប លោក នី ចរិយា ត្រូវបានតុលាការចោទប្រកាន់ពីបទសូកប៉ាន់សាក្សី និងសមគំនិតក្នុងរឿងសូកប៉ាន់សាក្សី។

ចំណែកឯមន្ត្រីបក្សប្រឆាំង ១៤នាក់ទៀត ក្នុងនោះមាន តំណាងរាស្ត្រលោក អ៊ុំ សំអាន និងសមាជិកព្រឹទ្ធសភា លោក ហុង សុខហួរ ផង ត្រូវបានឃុំខ្លួនទាំងមានអភ័យឯកសិទ្ធិ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ