តុលាការមួយនៅក្នុងទីក្រុងញូវដេលី ប្រទេសឥណ្ឌា បានកាត់ទោសបុរស ៥នាក់ ឲ្យជាប់គុកអស់មួយជីវិត ចំពោះបទល្មើសរំលោភបូកទៅលើស្ត្រីជនជាតិដាណឺម៉ាកម្នាក់ កាលពីឆ្នាំ២០១៤កន្លងមក។
ស្ត្រីភ្ញៀវទេសចរវ័យ ៥២ឆ្នាំរូបនោះ ត្រូវបានគេភ្ជង់ប្លន់ និងរំលោភកាលពីខែមករា ឆ្នាំ២០១៤កន្លងមក។
សារព័ត៌មាន BBC បានរាយការណ៍ថា មនុស្ស៩នាក់ ក្នុងនោះមានកូនក្មេង ៣នាក់ ត្រូវបានអាជ្ញាធរឥណ្ឌាចាប់ខ្លួនចំពោះការប្រព្រឹត្តបទល្មើសនេះ។ ជនជាប់ចោទម្នាក់ បានស្លាប់ ខណៈកូនក្មេងទាំង ៣នាក់ ត្រូវបានវិនិច្ឆ័យទោសនៅក្នុងតុលាការអនីតិជន។
បទល្មើសរំលោភផ្លូវភេទនៅឥណ្ឌា បានកើនឡើងចាប់តាំងមានការរំលោភបូក និងសម្លាប់និស្សិតម្នាក់ នៅលើរថយន្តក្រុង ក្នុងទីក្រុងដេលី កាលពីឆ្នាំ២០១២។
បុរសទាំង ៥នាក់នោះ មានសិទ្ធិប្ដឹងឧទ្ធរណ៍ទៅតុលាការជាន់ខ្ពស់ទៀត ប្រឆាំងនឹងការកាត់ទោសនេះ។
ភ្ញៀវទេសចរជនជាតិដាណឺម៉ាក បានរង្វេងផ្លូវត្រឡប់ទៅសណ្ឋាគាររបស់គាត់នៅតំបន់ប៉ាហាហ្កាន នៅពេលគាត់ដើរទៅសួររកផ្លូវពីបុរសទាំងនោះ។
ស្ត្រីរងគ្រោះ បានរៀបរាប់លម្អិតដល់ប៉ូលិស អំពីអ្វីដែលបានកើតឡើងចំពោះគាត់ មុននឹងគាត់ចាកចេញពីប្រទេសឥណ្ឌា ក្រោយរងការរំលោភបំពាន។
ករណីរំលោភបូកនៅឆ្នាំ២០១២ បាននាំឲ្យផ្ទុះការតវ៉ានានា និងការបង្កើតច្បាប់ថ្មីប្រឆាំងនឹងបទល្មើសរំលោភផ្លូវភេទ នៅក្នុងប្រទេសឥណ្ឌា។
ទោះជាយ៉ាងណា ការរំលោភបំពានផ្លូវភេទឃោឃៅប្រឆាំងស្ត្រី និងកុមារ នៅតែត្រូវបានគេរាយការណ៍ថាបន្តកើតមាននៅទូទាំងប្រទេសឥណ្ឌា៕