ប្រធានាធិបតីអាមេរិក លោក បារ៉ាក់ អូបាម៉ា នៅថ្ងៃពុធនេះបានថ្លែងវាយប្រហារទៅលើលោក ដូណាល់ ត្រាំ និងគណបក្សសាធារណរដ្ឋ ចំពោះសម្ដីខ្វះការពិចារណានិងសម្ដីប្រឆាំងនឹងជនមូស្លីម ដោយលោកព្រមានថា គោលនយោបាយរបស់គណបក្សនេះបង្កគ្រោះថ្នាក់និងមិនផ្ដល់ផលប្រយោជន៍ដល់អាមេរិក។
យោងតាមសេចក្ដីរាយការណ៍របស់ទីភ្នាក់ងារព័ត៌មាន AFP លោក អូបាម៉ា បានថ្លែងទាំងទឹកមុខមានកំហឹងថា សម្ដីរិះគន់របស់គណបក្សសាធារណរដ្ឋបានបង្កឲ្យមានកំហឹងផ្ទុះឡើង ប៉ុន្តែពុំបានទប់ស្កាត់អំពើភេរវកម្មនោះឡើយ។
ការបាញ់សម្លាប់មនុស្ស ៤៩នាក់នៅឯក្លឹបកម្សាន្តមួយកន្លែងនៅទីក្រុងអ័រឡេនដូពីសំណាក់ជនមូស្លីមម្នាក់បានបញ្ឆេះកំហឹងបន្ថែមទៀតទៅលើការពិភាក្សាទៅលើការគ្រប់គ្រងអាវុធ អំពើភេរវកម្ម អត្តសញ្ញាណភេទ និងជំនឿ នៅអំឡុងការបោះឆ្នោតក្នុងឆ្នាំនេះ។
ការបាញ់ប្រហារដ៏បង្ហូរឈាមនេះបានជំរុញឲ្យលោក ត្រាំ រំលឹកឡើងវិញពីសំណើដ៏ចម្រូងចម្រាស់របស់លោក ក្នុងការហាមឃាត់ជនមូស្លីមមិនឲ្យចូលទឹកដីអាមេរិកសម្រាប់ហេតុផលប្រឆាំងអំពើភេរវកម្ម។
លោក អូបាម៉ា បានចោទសួរទៅលើផែនការរបស់លោក ត្រាំ ថា «តើបញ្ហានេះបញ្ចប់នៅត្រង់ណា?» ហើយលោកថ្លែងថាសម្ដីរបស់លោក ត្រាំ ជាភាសាវាយប្រហារទៅលើជនចំណាកស្រុកនិងបង្ហាញឲ្យឃើញថាសហគមន៍សាសនាទាំងមូលជាប់ទាក់ទងនឹងអំពើហិង្សា។
សាររបស់លោក អូបាម៉ា បានទទួលការគាំទ្រពីលោកស្រី ហ៊ីលឡារី គ្លីនតុន បេក្ខនារីប្រធានាធិបតីនៃគណបក្សប្រជាធិបតេយ្យ៕