អូបាម៉ា ប្រាប់ឲ្យសម្តេចសង្ឃ ដាឡៃ ឡាម៉ា បើកការពិភាក្សាជាមួយចិន​

មន្ត្រីសេតវិមានបានថ្លែងថាលោកប្រធានាធិបតីអាមេរិកបារ៉ាក់ អូបាម៉ា បានជួបជា លក្ខណៈឯកជនជាមួយសម្តេចសង្ឃ ដាឡៃ ឡាម៉ា ហើយបានប្រាប់ឲ្យសម្តេចសង្ឃបើកការពិភាក្សាជាមួយចិន។

សម្តេចសង្ឃ ដាឡៃ ឡាម៉ា បានជួបគ្នានៅអាមេរិកជាមួយលោក អូបាម៉ា បើទោះជាមានការជំទាស់ពីភាគីចិនក៏ ដោយ។ ចិនបានប្រកាសច្រានចោលមិនព្រមជួបចរចាណាមួយជាមួយមេដឹកនាំរដ្ឋាភិបាលទីបេនិរទេសនៅក្រៅប្រទេសនេះទេ។

សារព័ត៌មាន BBC ចុះផ្សាយថាសម្តេចសង្ឃ ដាឡៃ ឡាម៉ា បានជួបគ្នាជាច្រើនលើកមកហើយជាមួយលោក អូបាម៉ា នៅសេតវិមានដែលជជែកគ្នាដោយបិទទ្វារ។

អ្នកនាំពាក្យក្រសួងបរទេសចិន លោក Lu Kang បានថ្កោលទោសចំពោះជំនួបរបស់សម្តេចសង្ឃនិងលោក អូបាម៉ា កាលពីថ្ងៃពុធ។ លោកថាការរៀបចំគម្រោងរបស់អាមេរិកឲ្យជួបគ្នានេះជាសញ្ញាខុសឆ្គងដែលឲ្យទីបេផ្តាច់ខ្លួនទទួលឯករាជ្យគឺជាការធ្វើឲ្យអាមេរិកនិងចិនអស់ជំនឿចិត្តលើគ្នាទៅវិញទៅមក៕