ស្រ្តី​ជា​តំណាងរាស្ត្រអង់គ្លេសម្នាក់​រងការបាញ់​សម្លាប់​

តំណាងរាស្ត្រអង់គ្លេសមួយរូបគឺលោកស្រី ចូ កូស អាយុ៤១ឆ្នាំមានកូនពីរនាក់នៅក្នុងបន្ទុកត្រូវខ្មាន់កាំភ្លើងបាញ់ស្លាប់ដួលនៅនឹងដីបង្កការរន្ធត់នៅក្នុងភូមិមួយនៃភាគខាងជើងនៃប្រទេស។

ទីភ្នាក់ការងារសារព័ត៌មាន AFP ចុះផ្សាយថាហេតុការណ៍បាញ់សម្លាប់នេះកើតឡើងកាលពីថ្ងៃព្រហស្បតិ៍ម្សិលមិញនៅលើផ្លូវជាតិទាំងកណ្តាលថ្ងៃ។ ការបាញ់សម្លាប់នេះនៅអំឡុងពេលដែលលោកស្រីធ្វើយុទ្ធនាការឃោសនាក្នុងការបោះឆ្នោតស្ទង់មតិអំពីការបោះឆ្នោតថា តើអង់គ្លេសគួរនៅបន្តជាសមាជិករបស់សភាពអឺរ៉ុបទៀតឬគួរចាកចេញ។

កូស គឺជាអ្នកត្រូវគេបាញ់សម្លាប់ទី១នៅក្នុងតំណែងសម្រាប់តំណាងរាស្ត្រអង់គ្លេសចាប់តាំងពីលោក ឡេន ហ្គោ ដែលត្រូវបានគេបាញ់សម្លាប់នៅក្នុងរថយន្តនៅឆ្នាំ១៩៩០។

មន្ត្រីនគរបាលបានថ្លែងថាក្រោយការបាញ់ប្រហារនោះពួកគេបានឃាត់ខ្លួនបុរសអាយុ៥២ឆ្នាំម្នាក់ដែលជាជនសង្ស័យហើយមានអាវុធនៅជាប់ខ្លួន។

កូស ជាអតីតអ្នកធ្លាប់ជួយការងារកម្មករហើយគាត់ទើបជាប់ឆ្នោតជាតំណាងរាស្ត្រកាលពីឆ្នាំមុន ប៉ុន្តែគាត់បានធ្វើយុទ្ធនាការជំរុញឲ្យរដ្ឋាភិបាលជួយបន្ថែមដល់ជនភៀសខ្លួនស៊ីរីនិង អំពាវនាវឲ្យមានការបោះឆ្នោតរក្សាអង់គ្លេសនៅក្នុងសហភាពអឺរ៉ុប៕