អ្នកគាំទ្ររាប់ពាន់នាក់បានប្រមូលផ្តុំដើម្បីតវ៉ារារាំងមិនឲ្យសមត្ថកិច្ចថៃឃាត់ព្រះកាយចៅអធិការវត្តពុទ្ធសាសនាដែលមានឥទ្ធិពលមួយនៅភាគខាងជើងនៃទីក្រុងបាងកក ដោយអ្នកគាំទ្រចោទថាការប៉ុនប៉ងឃាត់ព្រះកាយនេះ ជារឿងនយោបាយ។
ព្រះតេជគុណ ដាមម៉ាចាយោ ចៅអធិការវត្តដាមម៉ាកាយ៉ា រងការចោទថាបានលាងលុយកខ្វក់និងបន្លំលួចមូលនិធិរបស់វត្តយ៉ាងច្រើន។
ប៉ុន្តែបើទោះជាសមត្ថកិច្ចត្រៀមកម្លាំងឆ្មក់ចូលចាប់ព្រះកាយចៅអធិការវត្តនេះក៏ដោយ ក៏មិនទាន់បានសម្រេចដែរ ដោយសារតែពុទ្ធបរិស័ទរាប់ពាន់នាក់រារាំងបិទផ្លូវមិនឲ្យសមត្ថកិច្ចចូលក្នុងបរិវេណវត្តបានទេ។
បច្ចុប្បន្នព្រះចៅអធិការវត្តនេះក្នុងព្រះជន្ម៧២ព្រះវស្សាកំពុងស្នាក់នៅក្នុងវត្តគឺព្រះអង្គកំពុងមានជំងឺច្រើនមុខ។ ទោះយ៉ាងណាព្រះអង្គច្រានចោលការចោទប្រកាន់ ហើយហៅការប៉ុនប៉ងចាប់ព្រះកាយព្រះអង្គនេះថា គឺជារឿននយោបាយ។
ក្នុងសេចក្តីថ្លែងការណ៍របស់វត្តបានបញ្ជាក់ថាព្រះអង្គនឹងចូលរួមស្វែងរកដំណោះស្រាយតាមប្រព័ន្ធយុត្តិធម៌ នៅពេលដែលប្រទេសជាតិត្រលប់ទៅការដឹកនាំបែបប្រជាធិបតេយ្យវិញ។ ប្រទេសថៃបានស្ថិតនៅក្រោមការដឹកនាំរបស់ពួកយោធាតាំងពីឆ្នាំ២០១៤មក។ នគរបាលបានផ្អាកការវាយឆ្មក់ចូលក្នុងវត្ត បន្ទាប់ពីពុទ្ធបរិស័ទឡោមព័ទបិទផ្លូវនគរបាល៕
