ទីភ្នាក់ងារជនភៀសខ្លួនអង្គការសហប្រជាជាតិបានឲ្យដឹងថាចំនួនមនុស្សដែលបានគេចចេញពីជម្លោះមានកម្រិតខ្ពស់បំផុតនៅក្នុងប្រវត្តិសាស្ត្រ។
សារព័ត៌មាន BBC បានផ្សាយថាទីភ្នាក់ងារនេះបានវាយតម្លៃថាមនុស្ស៦៥.៣លាននាក់គឺជាជនភៀសខ្លួន ជនស្វែងរកសិទ្ធិជ្រកកោន និងជនចំណាកស្រុកក្នុងស្រុកនៅត្រឹមចុងឆ្នាំ២០១៥ពោលគឺជាបានកើនឡើង៥លាននាក់ធៀបនឹងឆ្នាំ២០១៤កន្លងមក។
តួលេខនេះបង្ហាញថាមនុស្សម្នាក់ក្នុងចំណោមមនុស្ស១១៣នាក់គឺជាជនភៀសខ្លួន។
ស្របពេលនេះដែរប្រមុខទីភ្នាក់ងារជនភៀសខ្លួនអង្គការសហប្រជាជាតិបាននិយាយថាក្ដីបារម្ភអំពីបរិយាកាសនៃជនបរទេសបានកើតឡើងនៅអឺរ៉ុប ខណៈតំបន់នេះព្យាយាមដោះស្រាយវិបត្តិជនចំណាកស្រុក។
កំណើនដ៏ធំបំផុតនៃជនចំណាកស្រុកគិតចាប់ពីក្រោយសង្គ្រាមលោកលើកទី២មកនោះបាននាំទៅការគាំទ្រកាន់តែធំចំពោះក្រុមជ្រុលប្រកាន់តឹងរឹងនិងគោលនយោបាយប្រឆាំងនឹងអន្តោប្រវេសន៍ដ៏ចម្រូងចម្រាស។
នៅក្នុងរបាយការណ៍ប្រចាំឆ្នាំរបស់ខ្លួនចេញចំទិវាជនភៀសខ្លួនពិភពលោក អង្គការសហប្រជាជាតិបាននិយាយថានេះគឺជាលើកទីមួយហើយដែលចំនួនជនចំណាកស្រុកនៅលើពិភពលោកបានកើនឡើងលើសពី៦០លាននាក់។
របាយការណ៍នោះបានបន្ថែមថាជាងពាក់កណ្ដាលនៃជនចំណាកស្រុកមកពីបណ្ដាប្រទេសហែកហួរដោយសង្គ្រាមមានស៊ីរី អាហ្វហ្កានីស្ថាន និងសូម៉ាលី។
ទោះបីការផ្ដោតភាគច្រើនទៅលើវិបត្តិជនចំណាកស្រុកនៅអឺរ៉ុបក៏ដោយ ក៏អង្គការសហប្រជាជាតិនិយាយថា ៨៦ភាគរយនៃជនចំណាកស្រុកត្រូវបានជ្រកកោននៅក្នុងបណ្ដាប្រទេសមានចំណូលទាបនិងមធ្យម។
យោងតាមអង្គការសន្តប្រវេសន៍អន្តរជាតិបានឲ្យដឹងថាជនចំណាកស្រុកជាង១លាននាក់បានធ្វើដំណើរទៅដល់អឺរ៉ុបតាមផ្លូវសមុទ្រកាលពីឆ្នាំមុន៕
