ក្រសួងសេដ្ឋកិច្ចនិងហិរញ្ញវត្ថុនិងក្រសួងទេសចរណ៍នឹងប្រជុំពិភាក្សាពិនិត្យលើលទ្ធភាពក្នុងការដំឡើងថ្លៃបណ្ណចូលទស្សនារមណីយដ្ឋានអង្គរ ដើម្បីដាក់ជូនប្រមុខរដ្ឋាភិបាលពិនិត្យនិងសម្រេច។
ក្នុងសេចក្តីប្រកាសព័ត៌មាន ចុះថ្ងៃទី២ កក្កដា ដែលវីអូឌីទើបទទួលបាននៅថ្ងៃអង្គារនេះ គ្រឹះស្ថានអង្គរដែលជាគ្រឹះស្ថានរបស់រដ្ឋក្នុងការគ្រប់គ្រងការលក់សំបុត្រជូនភ្ញៀវទេសចរចូលទស្សនារមណីយដ្ឋានអង្គរ បានឲ្យដឹងថាភាគីពាក់ព័ន្ធបានសម្រេចប្រគល់ភារៈកិច្ចឲ្យក្រសួងសេដ្ឋកិច្ចនិងហិរញ្ញវត្ថុដឹកនាំកិច្ចប្រជុំក្នុងការពិនិត្យលើការដំឡើងថ្លៃបណ្ណចូលទស្សនារមណីយដ្ឋានអង្គរ ដើម្បីស្នើដល់រដ្ឋាភិបាលដើម្បីពិនិត្យនិងអនុម័ត។ សេចក្តីប្រកាសបន្តថាភាគីពាក់ព័ន្ធក៏បានអនុម័តសម្រេចលើគំរូបណ្ណសម្រាប់បោះពុម្ពលក់ជូនភ្ញៀវទេសចរ ចូលទស្សនារមណីយដ្ឋានអង្គរឆ្នាំ២០១៧ ដោយបណ្ណមួយថ្ងៃពណ៌ខៀវ បណ្ណបីថ្ងៃពណ៌ក្រហមនិងបណ្ណប្រាំពីរថ្ងៃពណ៌ប្រផេះ។ សេចក្តីប្រកាសព័ត៌មានដដែលនោះបានឲ្យដឹងទៀតថាក្នុងរយៈពេល៦ខែដើមឆ្នាំ២០១៦នេះ គ្រឹះស្ថានអង្គរបានប្រមូលចំណូលបានជាង៣១លានដុល្លារអាមេរិក ដោយមានភ្ញៀវបរទេសជាង១លាននាក់។
គួរបញ្ជាក់ផងដែរថាបច្ចុប្បន្ននេះបណ្ណចូលទស្សនារមណីយដ្ឋានអង្គរមាន៣ប្រភេទ ដែលបណ្ណចូលទស្សនាមួយថ្ងៃតម្លៃ២០ដុល្លារ បីថ្ងៃតម្លៃ៤០ដុល្លារនិងប្រាំពីរថ្ងៃតម្លៃ៦០ដុល្លារ៕
