ក្រុមមេដឹកនាំបះបោរ បានព្រមាននៅថ្ងៃនេះថា ការបន្តប្រយុទ្ធ នឹងធ្វើឲ្យអន្តរាយដល់ការជំរុញរបស់លោកស្រី អ៊ុងសាន ស៊ូជី ឲ្យមានសន្តិភាពនៅក្នុងប្រទេសភូមា ខណៈដែលពួកគេបានស្វាគមន៍ដោយប្រុងប្រយ័ត្នចំពោះកិច្ចចរចារបស់រដ្ឋាភិបាលស៊ីវិលថ្មីរបស់លោកស្រី ស៊ូជី។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ទីភ្នាក់ងារព័ត៌មាននេះ បានរាយការណ៍ថា លោកស្រី ស៊ូជី បានបង្កើតគោលនយោបាយសន្តិភាពសម្រាប់រដ្ឋាភិបាលរបស់លោកស្រី ដែលបានឡើងដឹកនាំប្រទេសកាលពីខែមីនាកន្លងមក បន្ទាប់ពីក្រុមយោធាបានគ្រប់គ្រងប្រទេសនេះអស់ជាច្រើនទសវត្សរ៍មកហើយនោះ។
ជយលាភីពានរង្វាន់ណូប៊ែលសន្តិភាពរូបនេះ បានត្រួសត្រាយផ្លូវសម្រាប់បទឈប់បាញ់មួយ ជាមួយពួកឧទ្ទាមជនជាតិភាគតិចមួយចំនួន ដែលបានតស៊ូប្រយុទ្ធនឹងកងទ័ពជាតិភូមាអស់ជាច្រើនទសវត្សរ៍មកហើយនោះ។
កាលពីថ្ងៃអាទិត្យម្សិលមិញ លោកស្រី ស៊ូជី បានរៀបចំការចរចាជាមួយក្រុមមេដឹកនាំបះបោរ ដើម្បីជំរុញឲ្យក្រុមឧទ្ទាមសេសសល់មួយចំនួនទៀត ចុះហត្ថលេខាលើបទឈប់បាញ់ មុននឹងមានសន្និសីទសន្តិភាពគ្រោងធ្វើឡើងនៅចុងខែសីហាខាងមុខនេះ។
ប៉ុន្តែ ខណៈដែលពួកឧទ្ធាមនិយាយថា កិច្ចពិភាក្សាមានលក្ខណៈវិជ្ជមាននោះ ពួកគេបានព្រមានថា ការរីកចម្រើនទៅមុខ អាចសម្រេចបានតិចតួចប៉ុណ្ណោះ ដោយសារតែការប្រយុទ្ធគ្នានៅបន្តកើតមាននៅតាមតំបន់មួយចំនួន៕
