សន្និបាតគណបក្សសាធារណរដ្ឋបានក្លាយទៅជាច្របូកច្របល់នៅថ្ងៃអង្គារនេះ ខណៈដែលគូប្រជែងនឹងលោក ដូណាល់ ត្រាំ និងអ្នកគាំទ្រលោក ត្រាំ បានស្រែកទាំងកំហឹងដាក់គ្នាទៅវិញទៅមក ដែលបានបណ្ដាលឲ្យរំខាន់ដល់ផែនការប្រកាសតែងតាំងលោក ត្រាំ ជាផ្លូវការធ្វើជាបេក្ខជនប្រធានាធិបតីរបស់គណបក្សមួយនេះ។
ទីភ្នាក់ងារព័ត៌មាន AFP បានផ្សាយថា សំឡេងជេរប្រមាថ និងស្រែកដៀមដាម បានកើតឡើងពេញសន្និបាទគណបក្សសាធារណរដ្ឋ ដែលរៀបចំធ្វើឡើងនៅទីក្រុង Cleveland ក្នុងរដ្ឋអូហៃយ៉ូ ដែលបង្កឲ្យមានការបែកបាក់គ្នានៅក្នុងចំណោមអ្នកគាំទ្រក្នុងគណបក្សមួយនេះ។
ក្រុមប្រឆាំងលោក ត្រាំ បានស្រែកទាំងកំហឹងថា គណបក្សរបស់ពួកគេ នឹងត្រូវដឹកនាំដោយបុរសម្នាក់ ដែលបានចាត់ទុកជនជាតិម៉ិកស៊ិកជាជនរំលោភផ្លូវភេទ និងប្រកាសហាមឃាត់ជនមូស្លីម។ ពួកគេបានបង្ហាញកំហឹងរបស់ពួកគេ នៅពេលពួកគេមិនត្រូវបានគេផ្ដល់ឱកាសឲ្យបង្ហាញការមិនពេញចិត្តរបស់ពួកគេទៅលើលោក ត្រាំ។
ការតវ៉ាប្រឆាំងនឹងលោក ត្រាំ នេះ បានកើតឡើងចំពេលដែលលោក ត្រាំ កំពុងតែព្យាយាមប្រមូលផ្ដុំការគាំទ្រពីក្រុមអ្នករិះគន់នៅក្នុងគណបក្ស ឲ្យគាំទ្រដល់អភិបាលរដ្ឋ Indiana លោក Mike Pence ធ្វើជាដៃគូនៅក្នុងការយុទ្ធនាការឃោសនាបោះឆ្នោតនាពេលខាងមុខ៕
