អាជ្ញាធរទួគីបាននិយាយថាប្រទេសនេះបានបណ្ដេញមន្ត្រីជិត៩ពាន់នាក់ចេញពីតំណែងនៅក្នុងប្រតិបត្តិការបង្ក្រាបរបស់ខ្លួនប្រឆាំងនឹងក្រុមអ្នកដែលត្រូវគេសង្ស័យថាជាអ្នករៀបចំផែនការរដ្ឋប្រហារ ខណៈដែលអតីតមេបញ្ជាការកងទ័ពអាកាសបានបដិសេធថាមិនបានរៀបចំផែនការធ្វើរដ្ឋប្រហារកាលពីចុងសប្ដាហ៍កន្លងមកនោះទេ។
ខណៈដែលក្រុមសម្ព័ន្ធមិត្តលោកខាងលិចបានបង្ហាញក្ដីបារម្ភថាក្រុងអង់ការ៉ាអាចដាក់ឲ្យអនុវត្តទោសប្រហារជីវិតឡើងវិញ ដើម្បីឆ្លើយតបទៅនឹងរដ្ឋប្រហារដ៏បង្ហូរឈាមកាលពីថ្ងៃសុក្រសប្ដាហ៍មុននោះ ឧត្ដមសេនីយ៍ Akin Ozturk បានបង្ហាញខ្លួននៅក្នុងតុលាការទាំងមានសភាពឈឺចាប់លើរាងកាយ។
ទីភ្នាក់ងារព័ត៌មានរដ្ឋទួគី Anadolu បានដកស្រង់សម្ដីរបស់លោកឧត្ដមសេនីយ៍រូបនេះ ហើយត្រូវបានទីភ្នាក់ងារព័ត៌មាន AFP ចុះផ្សាយបន្ត។ លោក Akin Ozturk បានប្រាប់ទៅរដ្ឋអាជ្ញាថាលោកមិនមែនបុគ្គលដែលរៀបចំផែនការឬដឹកនាំរដ្ឋប្រហារនោះទេ ហើយលោកក៏មិនបានដឹងថានរណារៀបចំនិងដឹកនាំរដ្ឋប្រហារនេះដែរ។
ប្រធានាធិបតីទួគី លោក តាយីប អឺដូហ្គេន បានប្ដេជ្ញាបោសសម្អាតមេរោគនៃរដ្ឋប្រហារនេះដែលប៉ុនប៉ងដណ្ដើមអំណាវពីលោកនិងបណ្ដាលឲ្យមនុស្សជាង៣០០នាក់ស្លាប់។
ប៉ុន្តែសហរដ្ឋអាមេរិក សហភាពអឺរ៉ុប និងអង្គការសហប្រជាជាតិ បានព្រមានខ្លាំងៗអំពីការសងសឹកធ្វើឡើងដោយប្រធានាធិបតីទួគី ខណៈដែលអាជ្ញាធរប្រទេសនេះបានចាប់ខ្លួនមនុស្សជាច្រើនដែលត្រូវបានសង្ស័យថាជាអ្នករៀបចំផែនការធ្វើរដ្ឋប្រហារ៕
