តុលាការកំពូលប្រទេសហ្វលីពីននៅថ្ងៃអង្គារនេះបានសម្រេចទម្លាក់ចោលសំណុំរឿងប្រឆាំងនឹងអតីតប្រធានាធិបតីហ្វីលីពីនដ៏មានឥទ្ធិពលលោកស្រី ក្លូរៀ ម៉ាកាប៉ាហ្កាល់ អារីយ៉ូ និងបញ្ជាឲ្យដោះលែងលោកស្រីភ្លាមៗ បន្ទាប់ពីស្ថិតក្រោមការឃុំខ្លួននៅមន្ទីរពេទ្យអស់រយៈពេល៥ឆ្នាំមកនោះ។
លោកស្រី អារីយ៉ូ អាយុ៦៩ឆ្នាំគឺជាមេដឹកនាំប្រទេសហ្វីលីពីនចាប់ពីឆ្នាំ២០០១ដល់ឆ្នាំ២០១០ ប៉ុន្តែរដ្ឋការរបស់លោកស្រីបានធ្លាក់ទៅក្រោមអំពើពុករលួយនិងការកេងប្រវ័ញ្ចយកប្រយោជន៍។
ទីភ្នាក់ងារព័ត៌មានរ៉យទ័របានដកស្រង់សម្ដីអ្នកនាំពាក្យតុលាការកំពូល លោក Theodore Te ដែលបានថ្លែងក្នុងសន្និសីទចាក់ផ្សាយតាមទូរទស្សន៍ថាក្រុមចៅក្រម១១រូបទល់នឹង៤រូបបានសម្រេចទម្លាក់ចោលករណីនេះដោយសារខ្វះខាតភស្តុងតាង។
លោកស្រី អារីយ៉ូ កាលពីដំបូងឡើយត្រូវបានអាជ្ញាធរចាប់ឃុំខ្លួនក្រោមការចោទប្រកាន់ថាក្លែងបន្លំការបោះឆ្នោត ប៉ុន្តែនៅពេលក្រោយមកទៀត លោកស្រីត្រូវបានតុលាការចោទប្រកាន់ពីបទលួចថវិកាជាតិ៣៦៦លានប៉េសូឬ៧.៨២លានដុល្លារអាមេរិកនៅក្នុងមូលនីធិឆ្នោតជាតិ។
បើទោះបីជាប់ឃុំនិងជាប់បណ្ដឹងតាមផ្លូវច្បាប់ក្ដី លោកស្រី អារីយ៉ូ នៅតែជាបុគ្គលមានឥទ្ធិពលនៅក្នុងនយោបាយហ្វីលីពីន។ លោកស្រីបានជាប់ឆ្នោតជាសមាជិសភាជាថ្មីទៀតកាលពីខែឧសភាកន្លងមកនៅក្នុងរយៈពេល ៣អាណត្តិជាប់គ្នា។ ប៉ុន្តែលោកស្រីមិនដែលបានចូលរួមប្រជុំសភានោះឡើយ។
សេចក្ដីសម្រេចរបស់តុលាការនេះទទួលបានការស្វាគមន៍ពីប្រធានាធិបតីថ្មី លោក Rodrigo Duterte ដែលបាននិយាយថាលោកនឹងព្យាយាមដោះលែងលោកស្រី។
ទោះជាយ៉ាងណាលោកស្រី អារីយ៉ូ នៅតែប្រឈមមុខនឹងការស៊ើបអង្កេតនៅក្នុងករណីចោទប្រកាន់ថាលោកស្រីបានទទួលសំណូកជុំវិញកិច្ចព្រមព្រៀងផ្គត់ផ្គង់សេវាអ៊ិនធឺណិតតម្លៃ៣២៩លានដុល្លារជាមួយក្រុមហ៊ុនចិន ZTE Corp កាលពីឆ្នាំ២០០៧ ប៉ុន្តែលោកស្រីបានបដិសេធទៅនឹងការចោទប្រកាន់ទាំងអស់៕
