អាជ្ញាធរតៃវ៉ាន់បាននិយាយថារថយន្តក្រុងទេសចរណ៍តៃវ៉ាន់មួយគ្រឿងដឹកអ្នកដំណើរមកពីប្រទេសចិនបានបើកទៅបុកនឹងបង្កាន់ដៃនៅតាមផ្លូវធំមួយទៅកាន់ព្រលានយន្តហោះនៅថ្ងៃអង្គារនេះ ហើយបានផ្ទុះឆេះដោយបានសម្លាប់មនុស្ស២៦នាក់ជិះនៅលើរថយន្តនោះ។
ទីភ្នាក់ងារព័ត៌មានរ៉យទ័របានដកស្រង់សម្ដីអាជ្ញាធរតៃវ៉ាន់ដែលបាននិយាយនៅក្នុងសេចក្ដីថ្លែងការណ៍មួយថា រថយន្តក្រុងនោះដឹកភ្ញៀវទេសចរ២៤នាក់ដែលធ្វើដំណើរទេសចរណ៍រយៈពេល៨ថ្ងៃនៅកោះតៃវ៉ាន់។ អ្នកបើកបររថយន្តនិងមគ្គុទេសន៍ទេសចរណ៍ម្នាក់មកពីតៃវ៉ាន់ក៏បានស្លាប់នៅក្នុងគ្រោះថ្នាក់នោះផងដែរ។
អាជ្ញាធរតៃវ៉ាន់បានបញ្ជាក់ថាភ្លើងបានឆាបឆេះយ៉ាងលឿន បណ្ដាលឲ្យមនុស្សទាំង២៦នាក់ស្លាប់ទាំងអស់។ អ្នកដំណើរទាំងនោះកំពុងធ្វើដំណើរទៅព្រលានយន្តហោះតាវយន់ ទីក្រុងតៃប៉ិ ដើម្បីធ្វើដំណើរត្រឡប់ទៅចិនដីគោកវិញ។
តៃវ៉ាន់គឺជាកន្លែងទេសចរណ៍ដ៏ល្បីសម្រាប់ភ្ញៀវទេសចរចិនដីគោកដែលផ្ដល់នូវប្រភពចំណូលទេសចរណ៍ដ៏ធំសម្រាប់ដែនដីកោះមួយនេះ។ គ្រោះថ្នាក់ចរាចរណ៍នៅតៃវ៉ាន់ដែលពាក់ព័ន្ធនឹងភ្ញៀវទេសចរចិនដីគោកគឺជាបញ្ហាកម្រកើតមាន។
ចិនតែងតែចាត់ទុកកោះតៃវ៉ាន់ជាខេត្តមួយរបស់ខ្លួន ហើយជាច្រើនឆ្នាំមកហើយ ការធ្វើដំណើរទៅមករវាងដែនដីទាំងពីរនេះត្រូវបានរឹតបន្តឹង ប៉ុន្តែការផ្លាស់ប្ដូរភ្ញៀវទេសចរនឹងគ្នាត្រូវបានគេពង្រីកអស់រយៈពេលជាង២ទសវត្សរ៍មកហើយ ដោយជនជាតិចិនដីគោកជាច្រើនបានធ្វើដំណើរទៅទស្សនាដែនដីកោះប្រកាន់របបលទ្ធិប្រជាធិបតេយ្យមួយនេះ៕
