អាជ្ញាធរចិនបានស្នើឲ្យវៀតណាមបើកការស៊ើបអង្កេតលើភាពមិនប្រក្រតីនៃការបោះត្រាលើលិខិតឆ្លងដែនរបស់ប្រជាពលរដ្ឋចិនដែលបានធ្វើដំណើរទៅកាន់ប្រទេសវៀតណាម។
រូបភាពនោះបង្ហាញពីលិខិតដែលសរសេរពាក្យបួនម៉ាត់នៅលើលិខិតឆ្លងដែនពលរដ្ឋចិនធ្វើដំណើរទៅវៀតណាមនៅលើទំព័រទី២ ហើយភ្ជាប់ផែនទីបន្ទាត់៩កំណាត់របស់ចិន។ បន្ទាត់នោះជាកន្លែងដែលចិនអះអាងថា ជាតំបន់របស់ខ្លួននៅសមុទ្រចិនខាងត្បូង។ តំបន់នោះមានការអះអាងថាប្រសព្វគ្នាជាមួយវៀតណាម ហើយថ្មីៗនេះចិនបដិសេធមិនទទួលការសម្រេចរបស់តុលាការអន្តរជាតិ។
អ្នកទេសចរណ៍ជនជាតិចិនដែលមានឈ្មោះ Zhong បានទៅទស្សនកិច្ចវៀតណាមនៅហូជីមិញថ្លែងថា នាងមានការអន់ចិត្តខ្លាំងណាស់ ចំពោះសេវារបស់មន្ត្រីវៀតណាមធ្វើឲ្យមានបញ្ហាលើលិខិតឆ្លងដែនរបស់គាត់។
ស្ថានកុងស៊ុលចិននៅក្នុងទីក្រុងហូជីមិញបានចេញសេចក្តីថ្លែងការណ៍ថាសកម្មភាពរបស់អាជ្ញាធរវៀតណាមនេះជារឿងអាម៉ាស់និងកំសាកដែលធ្វើឲ្យប៉ះពាល់កិត្តិយសជាតិនិងប្រជាជនចិន។ ចិនក៏បានស្នើឲ្យមានការស៊ើបអង្កេតនិងដាក់ទណ្ឌកម្មចំពោះមន្ត្រីដែលប្រព្រឹត្តទង្វើនេះ៕
