ក្រុមរដ្ឋអ៊ីស្លាមបានអំពាវនាវទៅសមាជិករបស់ខ្លួនឲ្យអនុវត្តការវាយប្រហារនៅរុស្ស៊ី។ ការអំពាវនាវនេះត្រូវបានធ្វើឡើងតាមរយៈវីដេអូរយៈពេល៩នាទីមួយដែលត្រូវបានបង្ហោះចូលក្នុង YouTube កាលពីថ្ងៃអាទិត្យម្សិលមិញ។
ទីភ្នាក់ងារ Reuters បានផ្សាយថាបុរសពាក់ម៉ាស់មុខម្នាក់ដែលកំពុងបើកបររថយន្តមួយគ្រឿងនៅលើវាលខ្សាច់ បានស្រែកថា៖ «ស្ដាប់ណាលោក ពូទីន យើងនឹងទៅរុស្ស៊ី ហើយសម្លាប់លោកនៅឯផ្ទះរបស់លោក…។ បងប្អូន អនុវត្តតាមជីហាដ ហើយសម្លាប់និងប្រយុទ្ធប្រឆាំងនឹងពួកគេ»។
វីដេអូដែលមានដាក់អក្សរភាសាអង់គ្លេសនោះបានបង្ហាញរូបភាពមនុស្សប្រដាប់ដោយអាវុធវាយប្រហារទៅលើរថក្រោះនិងជំរុំតង់ ហើយប្រមូលយកអាវុធនៅលើវាលខ្សាច់។
គេមិនទាន់អាចបញ្ជាក់ច្បាស់អំពីវីដេអូនោះទេ ប៉ុន្តែលីងរបស់វីដេអូនោះត្រូវបានគេបង្ហោះចូលក្នុងប្រព័ន្ធ Telegram ដែលប្រើប្រាស់ដោយក្រុមបះបោរ។
គេក៏ពុំទាន់ដឹងច្បាស់អំពីមូលហេតុដែលពួករដ្ឋអ៊ីស្លាមកំណត់គោលដៅវាយប្រហារទៅលើប្រទេសរុស្ស៊ីនោះឡើយ ប៉ុន្តែ រុស្ស៊ី និងអាមេរិក កំពុងតែពិភាក្សាគ្នាអំពីការជំរុញទំនាក់ទំនងវិស័យយោធា និងចារកម្ម ប្រឆាំងនឹងពួករដ្ឋអ៊ីស្លាម និងពួកអាល់កៃដា នៅក្នុងប្រទេសស៊ីរី៕
