អតីតរដ្ឋមន្ត្រីការពារជាតិអ្នកស្រី Yuriko Koike ត្រូវបានជ្រើសរើសធ្វើជាអភិបាលក្រុងស្ត្រីដំបូងរបស់ទីក្រុងតូក្យូ។
សារព័ត៌មាន BBC បានផ្សាយថាអ្នកស្រី Koike ទទួលបានសំឡេងឆ្នោតជាង២.៩លានសំឡេងនៅក្នុងការបោះឆ្នោតកាលពីថ្ងៃអាទិត្យម្សិលមិញ ដោយបានយកឈ្នះគូប្រជែងរបស់លោកស្រីជាមួយគម្លាតដ៏ធំ។
បញ្ហាសំខាន់មួយដែលអ្នកស្រី Koike នឹងប្រឈមនោះគឺការដោះស្រាយបញ្ហាហិរញ្ញវត្ថុដែលបានប៉ះពាល់ដល់ការត្រៀមខ្លួនរបស់ទីក្រុងទូក្យូសម្រាប់ធ្វើជាម្ចាស់ផ្ទះនៃការប្រកួតកីឡាអូឡាំពិកឆ្នាំ២០២០។
រឿងអាស្រូវនានាជាប់ពាក់ព័ន្ធនឹងព្រឹត្តិការណ៍កីឡានេះបានបង្ខំឲ្យអភិបាលក្រុងពីររូបមកហើយ បានលាលែងចេញពីតំណែង។
អ្នកស្រី Koike អាយុ៦៤ឆ្នាំបានប្រាប់ទៅក្រុមអ្នកគាំទ្រថា អ្នកស្រីនឹងដឹកនាំនយោបាយទីក្រុងតូក្យូតាមបែបថ្មី ដែលពលរដ្ឋទីក្រុងតូក្យូមិនធ្លាប់ឃើញ។
អ្នកស្រី Koike គឺជាសមាជិកនៃគណបក្សប្រជាធិបតេយ្យសេរីរបស់លោកនាយករដ្ឋមន្ត្រី ស៊ិនហ៊្សូ អាបេ ប៉ុន្តែ គណបក្សនេះពុំបានគាំទ្រអ្នកស្រីនោះឡើយ។ ផ្ទុយទៅវិញអ្នកស្រីបានឈរឈ្មោះជាបេក្ខជនឯករាជ្យម្នាក់។
អ្នកស្រី Koike បានបញ្ចប់ការសិក្សាមកពីសាកលវិទ្យាល័យគែរ ក្នុងប្រទេសអេហ្ស៊ីប និងធ្លាប់ជាអ្នកសារព័ត៌មានទូរទស្សន៍មុននឹងចូលប្រឡូកក្នុងនយោបាយ៕
