ក្រសួងការបរទេសកម្ពុជាបានប្រកាសថាពលករខ្មែរ៥នាក់ ក្នុងចំណោមពលករ១៨នាក់ ដែលជាប់ឃុំនៅក្នុងពន្ធនាគារប្រទេសម៉ាឡេស៊ី នឹងវិលត្រឡប់មកប្រទេសកំណើតវិញនៅល្ងាចថ្ងៃពុធនេះ។
អ្នកនាំពាក្យក្រសួងការបរទេស លោក ជុំ សុន្ទរី បានថ្លែងនៅក្នុងសេចក្ដីប្រកាសព័ត៌មាននៅថ្ងៃពុធនេះថា ស្ថានទូតកម្ពុជាប្រចាំប្រទេសម៉ាឡេស៊ីបានជួយអន្តរាគមន៍ទៅរដ្ឋាភិបាលម៉ាឡេស៊ីឲ្យដោះលែងពលករខ្មែរជាប់ឃុំនៅទីនោះចំនួន១៨នាក់។
មន្ត្រីអ្នកនាំពាក្យរូបនេះបានឲ្យដឹងថាពលករចំនួន៥នាក់ក្នុងនោះមានពលការិនីម្នាក់ដែលសុទ្ធតែមានស្រុកកំណើតនៅឯខេត្តត្បូងឃ្មុំ នឹងធ្វើដំណើរមកដល់កម្ពុជានៅម៉ោងជាង៥ល្ងាចនេះ ខណៈពលករខ្មែរ១៣នាក់ទៀត កំពុងរង់ចាំសំបុត្រយន្តហោះត្រឡប់មកកម្ពុជាវិញ៕
